ვერის ბაღში მოქალაქეები ნაციონალური მოძრაობის წინააღმდეგ აქციას მართავენ. იქ შეკრებილები ამბობენ, რომ მეორე ტურში გაერთიანებული ოპოზიციის საპრეზიდენტო კანდიდატმა, გრიგოლ ვაშაძემ ვერ უნდა გაიმარჯვოს. მათ არ სურთ, რომ ნაციონალური მოძრაობა ხელისუფლებაში დაბრუნდეს.

"აქციის მიზანია, რომ არჩევნებზე გამოვიდეს ხალხი, ქუდზე კაცი, რომ საბოლოოდ დამარცხდეს აგრესიული რევანშის საფრთხე, რომელსაც წარმოადგენს ნაციონალური მოძრაობა", — განაცხადა აქციაზე მისულმა პოეტმა, დავით მაღრაძე.

ვერის ბაღში მისული მმართველი გუნდის მიერ მხარდაჭერილი საპრეზიდენტო კანდიდატის, სალომე ზურაბიშვილის მხარდამჭერები, მათ შორის, საზოგადოებისთვის ცნობილი ადამიანები არიან.

28 ოქტომბერს საპრეზიდენტო არჩევნების მიხედვით, გრიგოლ ვაშაძემ და სალომე ზურაბიშვილმა ხმების თითქმის ერთნაირი რაოდენობა მიიღეს და ვერც ერთმა მათგანმა 50 პროცენტიანი ბარიერი ვერ დაძლია.

ევროპული საქართველოს საპრეზიდენტო კანდიდატმა, დავით ბაქრაძემ განაცხადა, რომ მეორე ტურში გაერთიანებული ოპოზიციის კანდიდატს, გრიგოლ ვაშაძეს დაუჭერს მხარს. ვაშაძეს მხარდაჭერა გამოუცხადა რესპუბლიკურმა პარტიამაც.

ვაშაძის მხარდაჭერაზე უარი განაცხადეს შალვა ნათელაშვილმა ლეიბორისტული პარტიიდან და შენების მოძრაობის ლიდერმა, დავით უსუფაშვილმა.

გირჩის საპრეზიდენტო კანდიდატმა კი, ზურაბ ჯაფარიძემ განაცხადა, რომ მეორე ტურში ხმას აძლევს ადამიანს, "რომელმაც ის პედოფილთან გააიგივა", ანუ გრიგოლ ვაშაძეს. ის არ მოუწოდებს თავის არცერთ მხარდამჭერს, რომ ხმა მისცეს მეორე ტურში გასულ რომელიმე კანდიდატს. ის ამბობს, რომ თავისუფალი ადამიანები თავად მიიღებენ გადაწყვეტილება.