საქართველოს პრეზიდენტობის კანდიდატი, ზურა ჯაფარიძე, რომელიც არჩევნების მეორე ტურში ვერ გადის ამბობს, რომ მხარს უჭერს კანდიდატს (გრიგოლ ვაშაძეს), რომელმაც პედოფილად მოიხსენია. თქმით, ის არ მოუწოდებს თავის არცერთ მხარდამჭერს, რომ ხმა მისცეს მეორე ტურში გასულ რომელიმე კანდიდატს. ის ამბობს, რომ თავისუფალი ადამიანები თავად მიიღებენ გადაწყვეტილებას.

"ხმას მივცემ ადამიანს, რომლის კარიერული პიკი, რომ არა პრეზიდენტი სააკაშვილი, იქნებოდა საბჭოთა კავშირის საგარეო საქმეთა სამინისტროს საშუალო დონის ჩინოვნიკობა, რომელმაც პედოფილთან გამაიგივა პირადად მე და ასობით ათასი ამ ქვეყნის მოქალაქე, რომელმაც მთელი წინასაარჩევნო კამპანია ააგო იმ მიზანთან ბრძოლაზე, რისთვისაც ჩემი ცხოვრების უკანასკნელი 12 წლის მნიშვნელოვანი ნაწილი მაქვს დათმობილი, და რომლის არჩევის შემთხვევაში, შეიძლება აღმოჩნდეს რომ სულ ცოტა ხნის წინ ქვეყნის პირველ ლედის მოსკოვში აქვს ნაცეკვი 25 თებერვალს", — აღნიშნა ჯაფარიძემ.

მისი თქმით, ორივე კანდიდატი მიღებული გადაწყვეტილებებიდან გამომდინარე "გინებას დაიმსახურებენ" მისგან.

"ნებისმიერი მცდელობა ხაზის გავლების, თითქოს, ერთი უფრო ნაკლებად ცუდია, ან ნაკლებად საშიშია ვიდრე მეორე, ჩემთვის არის მასტურბაცია", — აღნიშნავს ჯაფარიძე.

On.ge ჯაფარიძის არგუმენტებს უცვლელი სახით გთავაზობთ:

  • თუ არსებობს შანსი, ივანიშვილის ხელში არ იყოს ფორმალური ძალაუფლების, თუნდაც ერთი, თუნდაც სუსტი ბერკეტი, ეს შანსი გამოსაყენებელია;
  • ნებისმიერმა ცარიელმა ადამიანმა მომავალში იცოდეს, რომ მხოლოდ ივანიშვილთან დაახლოება არ არის საკმარისი მაღალი სახელმწიფო თანამდებობის დასაკავებლად. და რომ მარგველაშვილი იქნება, ნარმანია, ბახტაძე, კობახიძე თუ სხვა — ეს ანომალიაა და არა წესი.

ცესკოს შედეგები

ცესკომ ხმების 100% დაითვალა. მონაცემების მიხედვით, საქართველოში მეორე ტური ხელისუფლების მხარდაჭერილ კანდიდატ სალომე ზურაბიშვილსა და გაერთიანებული ოპოზიციის კანდიდატ გრიგოლ ვაშაძეს შორის გაიმართება. ცესკომ წინასწარი მონაცემების განახლებული შედეგები რამდენიმე წუთის წინ გამოაქვეყნა.

შედეგები ასე გადანაწილდა:

  • სალომე ზურაბიშვილი (ხელისუფლების მხარდაჭერილი კანდიდატი) — 38,64%;
  • გრიგოლ ვაშაძე (ძალა ერთობაში) — 37,74%;
  • დავით ბაქრაძე (ევროპული საქართველო) — 10,97%;
  • შალვა ნათელაშვილი (ლეიბორისტული პარტია) — 3,74%;
  • ზურა ჯაფარიძე (გირჩი) — 2,26%;
  • დავით უსუფაშვილი (შენების მოძრაობა) — 2,26%.