ლეიბორისტული პარტიის ლიდერის, შალვა ნათელაშვილის თქმით, მისი ამომრჩეველი მეორე ტურში ქართული ოცნების მიერ მხარდაჭერილ საპრეზიდენტო კანდიდატს, სალომე ზურაბიშვილს ხმას არ მისცემს. ნათელაშვილის განცხადებით, ის თავის მომხრეებს კონკრეტული გადაწყვეტილების მიღებისკენ არ მოუწოდებს.

"არჩევანის თავისუფლება საკაცობრიო მონაპოვარია. ვერავის ვერაფერს დავავალებ და ავუკრძალავ. ერთი ვიცი, რომ ჩემს ამომრჩეველს ივანიშვილისა და მისი კანდიდატის ატანა არ აქვს, ამიტომ თუ არჩევნებზე მივლენ, მას ხმას არ მისცემენ", — ამბობს ნათელაშვილი განცხადებაში.

კითხვაზე, ნიშნავს თუ არა ეს გაერთიანებული ოპოზიციის კანდიდატის, გრიგოლ ვაშაძის მხარდაჭერას, პარტიის პრესსამსახურმა On.ge-ს განუცხადა, რომ ეს ნათელაშვილს არ უთქვამს.

საპრეზიდენტო არჩევნების მეორე ტური

2018 წლის საპრეზიდენტო არჩევნებზე ცესკომ ხმების 100% დაითვალა. მონაცემების მიხედვით, ხელისუფლების მხარდაჭერილ კანდიდატ სალომე ზურაბიშვილსა და გაერთიანებული ოპოზიციის კანდიდატ გრიგოლ ვაშაძეს შორის მეორე ტური გაიმართება.

შედეგები ასე გადანაწილდა:

სალომე ზურაბიშვილი (ხელისუფლების მხარდაჭერილი კანდიდატი) — 38,64%;
გრიგოლ ვაშაძე (ძალა ერთობაში) — 37,74%;
დავით ბაქრაძე (ევროპული საქართველო) — 10,97%;
შალვა ნათელაშვილი (ლეიბორისტული პარტია) — 3,74%;
ზურა ჯაფარიძე (გირჩი) — 2,26%;
დავით უსუფაშვილი (შენების მოძრაობა) — 2,26%.