საქართველოს მართლმადიდებელი ეკლესიის პატრიარქთან, ილია მეორესთან ძალა ერთობაშიას პრეზიდენტობის კანდიდატის, გრიგოლ ვაშაძის შეხვედრა დასრულდა. საპატრიარქოდან სანთლებით გამოსულმა პრეზიდენტობის კანდიდატმა შეხვედრის დეტალებსა და სამომავლო გეგმებზე ისაუბრა.

"უწმინდესს ძალიან აინტერესებდა, რა გეგმები გვაქვს ჩვენ იმისთვის, რომ საქართველოში დაინგრეს ის მახინჯი სისტემა, რომელიც ამდენი წელიწადია ბადებს ერთპარტიულ და ერთპიროვნულ მმართველობას", — განაცხადა ვაშაძემ.

მისივე თქმით, საუბარი შეეხო საპრეზიდენტო არჩევნების მშვიდ, ცივილიზებულ და დემოკრატიულ გარემოში ჩატარებასაც.

"მისი თხოვნა და ვერდიქტი იყო, რომ საქართველოში ოპოზიცია აღარასოდეს უნდა იყოს განდევნის ობიექტი, დატერორების და დევნის საგანი", — აღნიშნა ვაშაძემ.

ვაშაძის საპატრიარქოში ვიზტს წინ უსწრებდა ქართული ოცნების ლიდერების საპატრიარქოში სტუმრობა. 2 ნოემბერს საქართველოს საპატრიარქოში შეხვედრის შემდეგ მთავრობამ გადაწყვეტილება შეცვალა და კანაფის კონტროლის შესახებ კანონპროექტს პარლამენტიდან გაიწვევს. ამის შესახებ ჟურნალისტებს პატრიარქთან შეხვედრის ერთ-ერთმა მონაწილემ, შინაგან საქმეთა მინისტრმა, გიორგი გახარიამ განუცხადა.