ზუგდიდის ყოფილი მერი, ლაშა გოგია, რომელსაც ქრთამის აღების ბრალდების გამო 11-დან 15 წლამდე პატიმრობა ემუქრება, ზუგდიდში სალომე ზურაბიშვილის შტაბის წევრი იყო. აღნიშნული ინფორმაცია On.ge-ს ქართული ოცნების პრესსამსახურში დაუდასტურეს.

რუსთავი 2-ის კითხვაზე, რატომ არ დააკავეს ამ დრომდე გოგია და გულორდავა, გია ვოლსკი აცხადებს, გამოძიება საჭირო მტკიცებულებებს აგროვებდა.

"გამოძიებას ხელთ ჰქონდა რეალური მასალა, რომ არ ემოქმედა გამოვიდოდა, რომ ჩვენ რაღაც არჩევნებს ველოდებით და თუ დანაშაულია ჩადენილი, რეაგირება რაღაცნაირად უკავშირდება პოლიტიკურ პროცესს. რაც მთავარია კანონის გათვალისწინებით დააკავეს. თუმცა მე რა საკვირველია განვიცდი, როგორც ადამიანი. სამწუხაროა, მაგრამ გარდაუვალი იყო“ — განაცხადა გია ვოლსკიმ.

ზუგდიდის ყოფილი მერი, ლაშა გოგია და მერის ყოფილი მოადგილე გია გულორდავა ჯგუფურად, განსაკუთრებით დიდი ოდენობით ქრთამის აღების ფაქტზე დააკავეს.

ლაშა გოგიამ და მისმა მოადგილემ, გია გულორდავამ თანამდებობები 12 სექტემბერს, მიზეზის განმარტების გარეშე დატოვეს. გადადგომიდან ექვსი დღის შემდეგ ბრიფინგი გამართა, სადაც განაცხადა, რომ ის "პროვოკაციის მსხვერპლია და თავის უდანაშაულობას დაამტკიცებს".