საქართველოს პრემიერ-მინისტრის, მამუკა ბახტაძის განცხადებით, რამდენიმე დღის წინ მიიღო წერილი აშშ-ის თავდაცვის მდივნისგან, რომელშიც გენერალი ჯეიმს მატისი მადლობას უხდის საქართველოს თავდაცვის სფეროში გატარებული რეფორმების გამო. ამის შესახებ მამუკა ბახტაძემ საქართველოს თავდაცვისა და უსაფრთხოების კონფერენციაზე სიტყვით გამოსვლისას განაცხადა.

პრემიერის თქმით, წერილში ხაზგასმულია საქართველოს მთავრობის ძალისხმევა საქართველოს შეიარაღებული ძალების მზადყოფნისა და მოდერნიზაციის საქმეში. ბახტაძეს მიაჩნია, რომ ამაში უდიდესი წვლილი მიუძღვის საქართველოს თავდაცვის სამინისტროს.

"ეს წერილი ჩვენთვის ამ სფეროში მიღწეული წარმატებების კიდევ ერთი დასტურია", — განაცხადა პრემიერ-მინისტრმა.

მან თავისი გამოსვლა დაასრულა სიტყვებით, რომელიც ბახტაძის თქმით, მატისის წერილშია: "საქართველომ დაამტკიცა, რომ ის არის ნატოს ყველაზე ერთგული და საიმედო პარტნიორი".

საქართველოს პრემირ-მინისტრმა, მამუკა ბახტაძემ აშშ-ს მდივნისგან, ჯეიმს მატისისგან წერილი 26 ოქტომბერს მიიღო.

"საქართველომ უდიდესი მსხვერპლი გაიღო, რადგან იბრძვის ნატოსა და ავღანური ძალების მხარდამხარ ავღანეთის ერთ-ერთ ყველაზე სახიფათო პროვინციებში. ჩვენი ალიანსი დამოკიდებულია მამაც და გამძლე პარტნიორებზე, რომლებსაც სურთ, ზიარად იკისრონ უსაფრთხოების ინტერესების ტვირთი და მთელი მსოფლიოს სტაბილურობა უზრუნველყონ. საქართველომ დაამტკიცა, რომ არის ნატოს ყველაზე მტკიცე პარტნიორი", — ნათქვამია მატისის წერილში.