დონალდ ტრამპს სურს, რომ შეზღუდოს უფლება, რომლითაც იმიგრანტებისა და სხვა ქვეყნის მოქალაქეების შვილებს აშშ-ის ტერიტორიაზე დაბადების შემთხვევაში მოქალაქეობა ავტომატურად ენიჭებათ.

"ჩვენ ერთადერთი ქვეყანა ვართ მსოფლიოში, სადაც ადამიანი ჩამოდის და აჩენს ბავშვს, ბავშვი კი აუცილებლად ამერიკის შეერთებული შტატების მოქალაქე ხდება, ყველა სარგებლით. ეს სასაცილოა და უნდა დამთავრდეს", — ამის შესახებ ამერიკის შეერთებული შტატების პრეზიდენტმა Axios-თან ინტერვიუში ისაუბრა.

აშშ-ის პრეზიდენტის განცხადებით, ყოველთვის ეუბნებოდნენ, რომ ამ ცვლილებებისთვის საკონსტიტუციო შესწორება იყო საჭირო. მისი თქმით, ცვლილების განხორციელებას პრეზიდენტის მიერ გამოცემული დეკრეტით აპირებს.

აშშ-ის კონსტიტუციის მეთოთხმეტე შესწორების მიხედვით, ქვეყანაში დაბადებული ყველა ბავშვი მის მოქალაქეობას ავტომატურად იღებს. კანონით ბავშვს იმ შტატის მოქალაქეობაც ენიჭება, რომელშიც ბავშვი დაიბადება.