საპრეზიდენტო არჩევნების გამართვიდან ორი დღე გავიდა. იმის გამო, რომ ამ დრომდე ხელისუფლების მხარდაჭერილ კანდიდატს, სალომე ზურაბიშვილს შედეგებთან დაკავშირებით მედიასთან არ უსაუბრია გაჩნდა კითხვა რა გეგმები აქვს მას.

ამ დრომდე ზურაბიშვილის გეგმები მეორე ტურთან დაკავშირებით უცნობია. უცნობია, ასევე, აპირებს თუ არა არჩევნებში მონაწილეობას.

საქართველოს საარჩევნო კოდექსით (მუხლი 105), იმ შემთხვევაში, თუ ზურაბიშვილს არ ენდომება საპრეზიდენტო არჩევნების მეორე ტურში მონაწილეობა, მას კანდიდატურის მოხსნა მაინც არ შეუძლია. მისი სახელი და გვარი საარჩევნო ბიულეტენში მაინც ეწერება. გამარჯვებულად კი ჩაითვლება ის კანდიდატი, რომელიც უფრო მეტ ხმას მიიღებს.

როგორც ცესკოში განმარტავენ, თუ არჩეულ პირს პრეზიდენტობა არ მოუნდება, ის უნდა გადადგეს.

ცესკოს შედეგები

ცესკომ ხმების 100% დაითვალა. მონაცემების მიხედვით, საქართველოში მეორე ტური ხელისუფლების მხარდაჭერილ კანდიდატ სალომე ზურაბიშვილსა და გაერთიანებული ოპოზიციის კანდიდატ გრიგოლ ვაშაძეს შორის გაიმართება. ცესკომ წინასწარი მონაცემების განახლებული შედეგები რამდენიმე წუთის წინ გამოაქვეყნა.

შედეგები ასე გადანაწილდა:

  • სალომე ზურაბიშვილი (ხელისუფლების მხარდაჭერილი კანდიდატი) — 38,64%;
  • გრიგოლ ვაშაძე (ძალა ერთობაში) — 37,74%;
  • დავით ბაქრაძე (ევროპული საქართველო) — 10,97%;
  • შალვა ნათელაშვილი (ლეიბორისტული პარტია) — 3,74%;
  • ზურა ჯაფარიძე (გირჩი) — 2,26%;
  • დავით უსუფაშვილი (შენების მოძრაობა) — 2,26%.