გირგვლიანის საქმეზე კუდ-ის ყოფილ უფროსს დათა ახალაიას 7 წლითა და 6 თვით პატიმრობა მიუსაჯეს. მას ბრალად ედება სამსახურებრივი უფლებამოსილების ბოროტად გამოყენება, თავისუფლების უკანონო აღკვეთის ორგანიზება, დამამცირებელი ან არაადამიანური მოპყრობა და სამსახურებრივი სიყალბე.

პროკურატურა განმარტებით, 2006 წლის 27 იანვარს თბილისში, კაფე-ბარ შარდენბარში, სანდრო გირგვლიანს ვანო მერაბიშვილის ცოლისა და კონსტიტუციური უსაფრთხოების დეპარტამენტის უფროსის, დავით ახალაიას სუფრის წევრთან, თათია მაისურაძესთან სიტყვიერი შელაპარაკება მოუვიდა.

განცხადებაში აღნიშნულია, რომ შელაპარაკების გამო ახალაიამ თავისი უწყების თანამშრომლებს დაავალა სანდრო გირგვლიანი და მისი მეგობარი მანქანაში ძალით ჩაესვათ და ოქროყანის სასაფლაოზე წაეყვანათ. როგორც პროკურატურა განმარტავს, გირგვლიანი და მისი მეგობარი გააშიშვლეს და სასტიკად სცემეს. ნაწამები სანდრო გირგვლიანის გვამი კი ოქროყანის სასაფლაოს მიმდებარე ტერიტორიაზე იპოვეს.

გარდა ამისა, უწყება განმარტავს, რომ ვანო მერაბიშვილმა, ბაჩო ახალაიამ და დათო ახალაიამ დაგეგმეს და დაქვემდებარებული პირების გამოყენებით დაფარეს გირგვლიანის მიმართ ჩადენილი დანაშაული.

პროკურატურა განმარტავს, რომ დათა ახალაიამ გირგვლიანის გატაცებაში მონაწილე პირები შეკრიბა და მათგან მოითხოვა, რომ თავის თავზე აეღოთ პასუხისმგებლობა, არ დაესახელებინათ დამკვეთი და მონაწილეობაში მონაწილე სხვა პირები. ამის შედეგად კი 2006 წლის 6 მარტს სანდრო გირგვლიანის მიმართ დანაშაულში მონაწილე პირებად დასახელდნენ კუდ-ის სამმართველოს უფროსი გერონტი ალანია, ამავე დეპარტამენტის სამიუფროსი ოპერატიული თანამშრომლები.

პროკურატურის განცხადებით, ივანე მერაბიშვილი დაკავებისთანავე პირადად შეხვდა ბრალდებულებს ე.წ. მოდულის შენობაში წინასწარი დაკავების საკანში, იქეიფა მათთან ერთად საკანში გაშლილ სუფრაზე, თანადგომა და მხარდაჭერა აღუთქვა მათ.

სასამართლოს გადაწყვეტილებით გერონტი ალანია, ავთანდილ აფციაური, მიხეილ ბიბილურიძე და ალექსანდრე ღაჭავა ცნობილ იქნენ დამნაშავეებად ჯანმრთელობის დაზიანების, თავისუფლების უკანონო აღკვეთის და სამსახურებრივი უფლებამოსილების გადამეტებისთვის. სასჯელის სახედ და ზომად განესაზღვრათ: გერონტი ალანიას თავისუფლების აღკვეთა 7 წლით და ექვსი თვით, ხოლო მიხეილ ბიბილურიძეს, ავთანდილ აფციაურს და ალექსანდრე ღაჭავას - 6 წლით და 6 თვით თავისუფლების აღკვეთა.

პროკურატურის განცხადებით, წინასწარი დაპირების შესაბამისად, ბრალდებულები სარგებლობდნენ კანონით აკრძალული შეღავათებით. გარდა ამისა, მათ დანაშაულის რეალური გარემოებების, აგრეთვე აღნიშნულ დანაშაულში დავით ახალაიასა და შინაგან საქმეთა სამინისტროს სხვა თანამშრომლების დაფარვის სანაცვლოდ, ეტაპობრივად გადაეცათ თითოეულს 100 000 აშშ დოლარი.

2008 წლის 24 ნოემბერს საქართველოს იმჟამინდელმა პრეზიდენტმა, მიხეილ სააკაშვილმა საპატიმრო სასჯელები გაუნახევრა მსჯავრდებულებს, რის შემდეგაც მათ მიმართ შესაძლებელი გახდა პირობით ვადამდე გათავისუფლების სამართლებრივი მექანიზმის გამოყენება, რაც მოგვიანებით განხორციელდა კიდევაც.

პროკურატურამ ახალასიას სისხლის სამართლის რვა მუხლით წაუყენა ბრალდება. ამნისტიის შესახებ კანონისა და სასჯელთა შთანთქმის საფუძველზე, საბოლოოდ ახალაიას 7 წლითა და 6 თვით თავისუფლების აღკვეთა განესაზღვრა. დამატებითი სასჯელის სახით 1 წლითა და 6 თვით ჩამოერთვა საჯარო სამსახურში თანამდებობის დაკავების უფლება.