ბრაზილიის საპრეზიდენტო არჩევნების პირველ ტურში ულტრამემარჯვენე ჟაირ ბოლსონარომ გაიმარჯვა. ბოლსონარომ ხმების 55 პროცენტი მოიპოვა, ხოლო მისმა მეტოქემ, ფერნანდუ ადადამ — 45 პროცენტი.

შედეგების გამოცხადების შემდეგ ადადამ განაცხადა, რომ ოპოზიციაში გადავა. ახალი პრეზიდენტი მოვალეობის შესრულებას ოთხი წლის ვადით 2019 წლის პირველი იანვრიდან შეუდგება.

არჩევნების პირველ ტურში ბოლსონარომ ხმების 46 პროცენტი მიიღო, ხოლო ადადამ - 29 პროცენტი. ბრაზილიის მოქმედმა პრეზიდენტმა მიშელ ტამერმა ბოლსონაროს გამარჯვება უკვე მიულოცა.

63 წლის ჟაირ ბოლსონარო ბრაზილიაში 1985 წლის სამხედრო მმართველობის დამხობის შემდეგ პირველი ულტრამემარჯვენე ლიდერი იქნება.

ბოლსონაროს თავისი რიტორიკის გამო ბრაზილიაში ბევრი მოწინააღმდეგე ჰყავს. ის ჩილეში პინოჩეტეს ავტორიტარულ მმართველობას აქებს, ასევე, ბრაზილიის სამხედრო მმართველობას, რომელიც ქვეყანას 1985 წლამდე მართავდა. ბოლსონარო ამრეზით უყურებს ქალებისა და უმცირესობების უფლებების დაცვას, თავის გამოსვლებში შეურაცხყოფს იმიგრანტებსა და ეთნიკურ უმცირესობებს. 2016 წელს სასამართლომ ის დააჯარიმა, რადგან გამოსვლისას ქალ დეპუტატს უთხრა, რომ "არ გააპატიურებდა მას, რადგან ის ამას არ იმსახურებდა".

გარდა ამისა, ბოლსონარო აშშ-სთან კარგი ურთიერთობების მომხრეა. მას "ტროპიკების ტრამპსაც" კი უწოდებენ. ბოლსონარო სხვა ლათინოამერიკელი პოპულისტებისგან იმით განსხვავდება, რომ მემარცხენეა და ეკონომიკური თავისუფლების მომხრეა, მაგრამ არა - პირადი თავისუფლების.

პრეზიდენტობის კანდიდატი თავისი მოსაზრებების გამო თავდასხმის მსხვერპლიც გახდა. 6 სექტემბერს ამომრჩეველთან შეხვედრის დროს ის მუცელში ცივი იარაღით დაჭრეს.