ამ დროისთვის დათვლილი მონაცემებით, ხონი ერთადერთი ოლქია, სადაც ევროპული საქართველოს პრეზიდენტობის კანდიდატი, დავით ბაქრაძე 38,73%-ით ლიდერობს. მეორე ადგილზეა მმართველი გუნდის მიერ მხარდაჭერილი კანდიდატი, სალომე ზურაბიშვილი 37,99%-ით და მესამეზე — ნაციონალური მოძრაობის პრეზიდენტობის კანდიდატი, გრიგოლ ვაშაძე, 19,61%-ით.

ხონი, ვანთან ერთად სწორედ ის ოლქია, სადაც ევროპული საქართველოს მაჟორიტარი დეპუტატობის კანდიდატმა, თბილისის ყოფილმა მერმა და ევროპული საქართველოს გენერალურმა მდივანმა, გიგი უგულავამ კენჭი იყარა.

ამ მომენტისთვის სულ 3 705 მონაცემები დათვლილია 904 ოლქში. პირველ ადგილზეა, 43,59%-ით სალომე ზურაბიშვილი, მეორე ადგილზე კი ნაციონალური მოძრაობის კანდიდატი, გრიგოლ ვაშაძე 34,83%-ით.

რაც შეეხება სხვა კანდიდატებს დავით ბაქრაძეს აქვს 10,36% , შალვა ნათელაშვილს 3,88%, ზურა ჯაფარიძეს 1,71%, დავით უსუფაშვილს 1,74% და კახა კუკავა 1,12%.

მეორე ტურის გამართვა აღიარა ქართული ოცნების თავმჯდომარემ, ირაკლი კობახიძემაც. მისი თქმით, მეორე ტურში ვაშაძე და ზურაბიშვილი გადავლენ.

სამი ეგზიტპოლი და სამი შედეგი

საქართველოში საპრეზიდენტო არჩევნები დასრულდა და სამი ეგზიტპოლის მიხედვით, სამი სხვადასხვა შედეგი დაიდო.

მმართველი პარტიის ეგზიტპოლით, 52.3 %-ით მათმა მხარდაჭერილმა კანდიდატმა, სალომე ზურაბიშვილმა გაიმარჯვა. მათი თქმით, 28.1 % აქვს გაერთიანებული ოპოზიციის კანდიდატს, გრიგოლ ვაშაძეს და 9.2% ევროპული საქართველოს კანდიდატს, დავით ბაქრაძეს. ფსიქოპროექტმა 100 უბანზე 5104 ადამიანი გამოკითხა. ცდომილების ფარგლები 2.6%-ია.

ევროპული საქართველოს ეგზიტპოლით მეორე ტური იმართება. კერძოდ, 37% აქვს გრიგოლ ვაშაძეს და 34% სალომე ზურაბიშვილს. პარტიის კანდიდატს, დავით ბაქრაძეს 17% აქვს, შალვა ნათელაშვილს კი — 4. კომპანია BCG-მ 105 საარჩევნო უბანზე 6 000 ადამიანი გამოკითხა. მაქსიმალური ცდომილება 3%-ია.

რუსთავი 2-ის მიერ ჩატარებული ეგზიტპოლის შუალედური შედეგებითაც სალომე ზურაბიშვილს და გრიგოლ ვაშაძეს 40-40% ქონდათ, დავით ბაქრაძეს კი — 10%.