საერთაშორისი გამჭვირვალობა - საქართველოს ინფორმაციით, ზუგდიდის #31 უბანზე ამომრჩეველს ხმა პირადობის მოწმობის ასლით მიაცემინეს, რაზეც მათმა დამკვირვებელმა საჩივარი დაწერა.

ორგანიზაციის განცხადებით, პირველი საათის მდგომარეობით 50-მდე დარღვევა გამოავლინეს:

"თითქმის ყველა საარჩევნო უბნის გარეთ შეიმჩნევა საპრეზიდენტო კანდიდატების კოორდინატორების მობილიზება, რაც დაძაბულ ატმოსფეროს ქმნის".

ორგანიზაციის ინფორმაციით, სამტრედიის #16 საარჩევნო უბანზე ამომრჩეველმა ჩაამტვრია მინდა და ამომრჩეველთა სამაგიდო სიის დაზიანება სცადა.

"კომისიის თავმჯდომარემ პატრული გამოიძახა. ინციდენტის ამოწურვის შემდეგ უბანზე ხმის მიცემის პროცესი განახლდა", — აღნიშნულია განცხადებაში.

დარღვევები, რომელიც ორგანიზაციამ გამოავლინა:

  • გურჯაანის #3 საარჩევნო უბანზე გადასატანი ყუთიდან ერთით ნაკლები ბიულეტენი დაბრუნდა;
  • გურჯაანის #12 საარჩევნო ოლქის #2 საარჩევნო უბანზე ერთ-ერთ ამომრჩეველს გარეთ გაყვა სადამკვირვებლო ორგანიზაციის საქართველოს ერთიან ახალგაზრდათა კავშირი დამკვირვებელი, რომელმაც თანხა გადასცა მას. ეს პირი არ უარყოფს ფულის გადაცემის ფაქტს;
  • გურჯაანის #12 საარჩევნო ოლქის #25 საარჩევნო უბანზე კომისიის ერთ-ერთმა წევრმა კაბინის გარეთ მისცა ხმა, ანუ შემოხაზა სასურველი კანდიდატი;
  • მარნეულის #22 საარჩევნო ოლქის #55 საარჩევნო უბანზე ერთი და იმავე სადამკვირველო ორგანიზაციის ორი წარმომადგენელი იმყოფებოდა;
  • ნინოწმინდის #41 საარჩევნო ოლქის #2 საარჩევნო უბანზე და #56 ჭიათურის საარჩევნო ოლქის #26 უბანზე გარკვეული დროის განმავლობაში კომისიის თავმჯდომარეები უბანზე არ უშვებდნენ დამკვირვებლებს;
  • გლდანის #10 საარჩევნო ოლქის #100 უბანზე, #32 გორის საარჩევნო ოლქის #88 უბანზე, #79 ბათუმის საარჩევნო ოლქის #7, 25, 89 უბნებზე ერთიანი ნაციონალური მოძრაობის მიერ დანიშნულმა კომისიის წევრებმა უარი თქვეს გადასატანი საარჩევნო ყუთის წამღები კომისიის წევრების გამოსავლენ წილისყრაში მონაწილეობაზე;

  • დმანისის #24 საარჩევნო ოლქის #32 უბანზე ერთ-ერთი რეგისტრატორი გარკვეული პერიოდის განმავლობაში ბიულეტენებზე ბეჭედს უკუღმა არტყამდა, რაც შეიძლება ბიულეტების ბათილობის საფუძველი გახდეს.

ბოლო სიახლეები: საპრეზიდენტო არჩევნები 2018

ამავე თემაზე: