ფილიპინების პოლიციის ხელმძღვანელები ხუთშაბათს, 18 აგვისტოს, სენატის სხდომას დაესწრნენ, სადაც ანტი-ნარკოტიკული სააგენტოს დაარსებასა და სატელეფონო მოსმენების საწინააღმდეგო კანონი უნდა განეხილათ - თუმცა სენატორები ნარკოტიკებთან დაკავშირებული მკვლელობებით უფრო დაინტერესდნენ.

ფილიპინების ეროვნული პოლიციის უფროსმა რონალდ "ბატო" დელა როსამ განაცხადა, რომ პირველი ივლისიდან 15 აგვისტომდე, გამოძიებაში 899 სიკვდილი ფიგურირებს.

დელა როსა CNN-თან ინტერვიუში ამბობს, რომ 7 კვირაში, ანუ მას შემდეგ, რაც თანამდებობაზე დაინიშნა გამოვლინდა 600 ათასზე მეტი ადამიანი, რომელსაც ნარკოტიკებთან კავშირი აქვს. რამდენიმე ათასი მათგანი დაკავებულია, ხოლო 600-ზე მეტი მოკლულია პოლიციის მიერ განხორციელებული ოპერაციების დროს.

ფილიპინები

ფოტო: Getty Images

აღნიშნული უკვე შეფასდა საერთაშორისო ორგანიზაციების მიერ როგორც არაადამიანური, არაჰუმანური მოპყრობა.

300-ზე მეტმა სამოქალაქო ჯგუფმა და ორგანიზაციამ მიმართა წერილით გაეროს, რათა მიეღო შესაბამისი ზომები.

"სიჩუმე არის მიუღებელი, როდესაც ყოველდღიურად კლავენ ადამიანებს ქუჩებში".

ფილიპინები

ფოტო: Barcroft Images

ანტი-ნარკოტიკული კამპანია და მკვლელობების რიცხვის ზრდა მას შემდეგ დაიწყო, რაც, დაახლოებით თვე ნახევრის წინ ფილიპინელებმა ახალი პრეზიდენტი, როდრიგო დუტერტე აირჩიეს.

ინაუგურაციის დღეს პრეზიდენტმა მოქალაქეებს მიმართა: "თუ ფლობთ ინფორმაციას ნარკოდამოკიდებულთა შესახებ თქვენი ხელით მოკალით ისინი, რადგან მათი მშობლების იძულება ზედმეტად მტკივნეული იქნებოდა".