უკრაინის პრეზიდენტის, პეტრო პოროშენკოს თქმით, ქვეყანაში სპეციალური სამინისტრო შეიქმნება, რომელიც დონბასის საქმეებზე იქნება ორიენტირებული. ამის შესახებ ინფორმაციას სააგენტო ТАСС ავრცელებს.

პოროშენკოს განმარტებით, აღნიშნული სამინისტრო იქმნება იძულებით გადაადგილებულ პირთა საკითხების მოსაგვარებლად.

უკრაინის პრეზიდენტმა განმარტა, რომ ამ ეტაპზე სამხედრო ოპერაციებში 69 ათასი უკრაინელი მებრძოლი მონაწილეობს. მისი თქმით, ჯარში მსახურების საკონტრაქტო პირობების გაუმჯობესების წყალობით წლის დასაწყისში 18 688 ქალმა და კაცმა გადაწყვიტა ჯარში კონტრაქტით წასვლა.

პოროშენკომ ასევე აღნიშნა, რომ ამჟამად 127 363 უკრაინელმა მებრძოლმა და მოხალისემ სამხედრო მოქმედებებში მონაწილის სტატუსი მიიღო, ათი ათასობით ადამიანის შესაბამისი დოკუმენტაცია კი განხილვის სტადიაშია.

ახალი სამინისტროს მეთაურის პოსტზე კანდიდატად ვადიმ ჩერნიში განიხილება, რომელიც ამჟამად დონბასთან დაკავშირებული საკითხების სააგენტოს ხელმძღვანელია.

პოროშენკომ ასევე მოუწოდა, რომ დონბასის მშვიდობიანად დაბრუნების მიზნით კონსტიტუციაში, დეცენტრალიზების კუთხით, უნდა შევიდეს ცვლილებები:

"კონსტიტუციაში დეცენტრალიზების კუთხით ცვლილებები და მინსკის შეთანხმების შესრულება - ეს არის მშვიდობიანი დონბასის დაბრუნების მთავარი საფუძველი".