სომხეთის ეროვნული კრება დღეს, 24 ოქტომბერს ახალ პრემიერ-მინისტრს ირჩევს. რამდენიმე დღით ადრე კი საპარლამენტო ფრაქცია ელკმა კანდიდატად პრემიერ-მინისტრობის მოვალეობის შემსრულებელი ნიკოლ პაშინიანი წარადგინა.

პაშინიანის კანდიდატურა ფორმალურია, რადგან ის და მისი გუნდის წევრები დაინტერესებული არიან, რომ ახალი პრემიერ-მინისტრი არ აირჩიონ და ქვეყანაში ვადამდელი საპარლამენტო არჩევნები ჩატარდეს.

პაშინიანი ტაქტიკური მიზეზების გამო 16 ოქტომბერს გადადგა. მან განაცხადა, რომ კანდიდატურა მხოლოდ ფორმალური პროცედურების გამო წარადგინა.

"მე კანდიდატურა წარვადგინე, რათა არ ამირჩიონ. შესაბამისად, ეროვნულმა კრებამ მე არ უნდა ამირჩიოს", - განაცხადა პაშინიანმა.

პაშინიანის გეგმის მიხედვით, პარლამენტმა მომდევნო ორი კვირის განმავლობაში ორივე ჯერზე პრემიერი ვერ უნდა აირჩიოს, რის გამოც, კონსტიტუციის მიხედვით, სომხეთის ეროვნული კრება დაშლილად გამოცხადდება და ქვეყანაში ვადამდელი საპარლამენტო არჩევნები დაინიშნება. პაშინიანმა განაცხადა, რომ მომდევნო ორი კვირის განმავლობაში კონკურენტი პარტიები პრემიერობის კანდიდატებს არ წარადგენენ, რაც მისი გეგმის განხორციელებას შეუწყობს ხელს.

ამ ეტაპზე ეროვნულ კრებაში უმრავლესობას რესპუბლიკური პარტიის ფრაქცია წარმოადგენს, რომლის ლიდერი იყო ყოფილი პრეზიდენტი და პრემიერ-მინისტრი სერჟ სარგსიანი. სარგსიანი აპრილში ხავერდოვანი რევოლუციის შედეგად გადადგა.