პარტია ქართული ოცნების თავმჯდომარე ბიძინა ივანიშვილი არასამთავრობო სექტორზე პარლამენტის თავმჯდომარის, ირაკლი კობახიძის განცხადებას გამოეხმაურა.

ბიძინა ივანიშვილის აზრით, ირაკლი კობახიძემ ადეკვატური განცხადება გააკეთა, როცა არასამთავრობო ორგანიზაციების ნაწილი პოლიტიკურ პარტიად მოიხსენია.

ბიძინა ივანიშვილმა საერთაშორისო საზოგადოება საქართველოს დირექტორი ეკა გიგაური ახსენა და თქვა, რომ ის სამოქალაქო საზოგადოების ეტალონი არ არის.

"ესენი არიან ნაციონალური მოძრაობის აქტივი, რომელიც შეფარულად შევიდა სამოქალაქო საზოგადოებაში და თავს ესხმის ხელისუფლებას. აბსოლუტურად ადეკვატური განცხადება გააკეთა ირაკლი კობახიძემ", — თქვა ივანიშვილმა.

ქართული ოცნების დამფუძნებლის თქმით, არასამთავრობოებმა არ შეაფასეს ნიკა გვარამიას განცხადება, სადაც სალომე ზურაბიშვილს მოღალატე უწოდა, რაც მათ მიკერძოებულობას ხაზს უსვამს.

არასამთავრობოების გაკრიტიკების მიზეზი

13 არასამთავრობო ორგანიზაციის მიერ გავრცელებულ განცხადებას ელიტურ კორუფციასა და სასამართლოს კლანურ მმართველობაზე პარლამენტის თავმჯდომარემ, ირაკლი კობახიძემ არასერიოზული უწოდა. მისი თქმით, "ეს არის 13 კაცი და ქალი", რომელთან მიკერძოებულად პოლიტიკური შეხედულებები აქვთ.

პარლამენტის თავმჯდომარე მიიჩნევს, რომ არასამთავრობო ორგანიზაციებს საზოგადოებასთან კავშირი არ აქვთ და მესამე სექტორი მტკიცებულებების გარეშე საუბრობს.

პირველ ოქტომბერს გავრცელებულ განცხადებაში არასამთავრობო ორგანიზაციები აღნიშნავდნენ, რომ დღევანდელი ხელისუფლების პირობებში არსებობენ ადამიანები, რომლებიც კანონზე მაღლა დგანან და სრული ხელშეუხებლობით სარგებლობენ.

განცხადებაში აღნიშნულია, რომ ქვეყანაში დემოკრატიის მძიმე კრიზისია და ამაზე სასამართლო სისტემა, სამართალდამცავი სტრუქტურების პოლიტიზირება და პარლამენტის, როგორც პოლიტიკური ცენტრის, სისუსტე მიუთითებს.