კანაფის ლეგალიზაციის ფესტივალზე დაკავებული გირჩის საპრეზიდენტო კანდიდატი, ზურაბ ჯაფარიძე პოლიციის მთავარი სამმართველოდან გაათავისუფლეს. სამმართველო დატოვა გირჩის თავმჯდომარე, იაგო ხვიჩიამ და გირჩის წევრებმა, ნიკა ობოლაძემ და ვახტანგ მეგრელიშვილმაც.

ზურა ჯაფარიძე დღეს, 20 ოქტომბერს მას შემდეგ დააკავეს, რაც მან სამი ცალი ჯოინთი დედაენის ბაღში მარიხუანის ლეგალიზაციის ფესტივალისთვის შეკრებილებს დაურიგა. მის დაკავებას დაპირისპირება მოჰყვა, რა დროსაც პოლიციამ რამდენიმე მოქალაქე დააკავა.

შინაგან საქმეთა სამინისტროში განაცხადეს, რომ ზურა ჯაფარიძე პოლიციას თავისი ნებით გაყვა.

"ვინაიდან ზურაბ ჯაფარიძე პრეზიდენტობის კანდიდატია, სამართალდამცველებმა მას შესთავაზეს საგამოძიებო მოქმედებებში მონაწილეობის მისაღებად, პოლიციის განყოფილებაში გაყოლა. ზურაბ ჯაფარიძე პოლიციის თანამშრომლებს გაჰყვა ნებაყოფლობით", — ნათქვამია შსს-ს განცხადებაში. უწყების თქმით, მისი მონაწილეობით მიმდინარეობდა საგამოძიებო მოქმედებები.

თუმცა, გირჩში აცხადებდნენ, რომ ჯაფარიძე პოლიციას ნებაყოფლობით არ გაჰყოლია და ის გაიტაცეს.