"ქართულმა საზოგადოებამ ქართული ოცნება იმ მიზნით აირჩია, რომ მსგავსი სისტემური დანაშაულები საქართველოში დასრულებულიყო", — ასე გამოეხმაურა საქართველოს პრემიერ-მინისტრი მამუკა ბახტაძე "მირზა სუბელიანის ფარულ ჩანაწერებს".

პრემიერის განცხადებით, ოპონენტები ცდილობენ, რომ შექმნან ილუზია, თითქოს საქართველოში ეს პრობლემა გადალახული არ არის.

"დღეს, ჩვენი ოპონენტები, რომლებიც ამას უშუალოდ აკეთებდნენ, ცდილობენ რეალობის მოდელირებას", — განაცხადა პრემიერ-მინისტრმა.

ტელეკომპანია რუსთავი 2-მა 14 ოქტომბერს ხორავას ქუჩის საქმეზე დანაშაულის შეუტყობინებლობისთვის დაკავებული, მირზა სუბელიანის სავარაუდო აუდიოჩანაწერები გაავრცელა. აუდიჩანაწერში საუბარია გახმაურებული საქმეების გახსნის ძალადობრივ მეთოდებზე, ხელისუფლების კომპრომატებზე, ხორავას ქუჩის საქმეზე და სავარაუდოდ, ყოფილი პრემიერის, ვანო მერაბიშვილის ციხიდან გაყვანის ეპიზოდზე.

აუდიოჩანაწერში, რომლის ავთენტურობა ჯერ დადგენილი არ არის, სავარაუდოდ, სუბელიანი ქართული ოცნების დეპუტატ ვიქტორ ჯაფარიძესთან და ლტოლვილთა სამინისტროს ყოფილ მაღალჩინოსანთან, გენერალური ინსპექციის ყოფილ თანამშრომელთან, დათო ცუხიშვილთან საუბარია ასახული.

რუსთავი 2-მა "მირზა სუბელიანის ციხეში ჩაწერილი მორიგი ფარული აუდიოჩანაწერი" გუშინ, 17 ოქტომბერსაც გაავრცელა. ამ ჩანაწერის გმირები ისევ სავარაუდოდ, მირზა სუბელიანი და ვიქტორ ჯაფარიძე არიან. ჩანაწერების ავთენტურობა დადგენილი არ არის.

გაიგეთ მეტი: