ბილ გეიტსმა Microsoft-ის თანადამფუძნებლის, პოლ ალენის გარდაცვალებასთან დაკავშირებით სპეციალური განცხადება გაავრცელა. წერილში გეიტსი ალენს მის საუკეთესო მეგობარად მოიხსენიებს და მასთან ერთად გატარებულ წლებს იხსენებს.

"მე და პოლი ერთმანეთს მეშვიდე კლასში შევხვდით და მას შემდეგ ჩემი ცხოვრება მნიშვნელოვნად შეიცვალა. ჩემზე ორი კლასით ზემოთ სწავლობდა, ძალიან მაღალი იყო და რაც მთავარია, ნამდვილი გენიოსი კომპიუტერულ ტექნოლოგიებში", - წერს ბილ გეიტსი.

პოლ ალენმა და ბილ გეიტსმა Microsoft 1975 წელს დააფუძნეს და მას შემდეგ საქმიანობას ერთად უძღვებოდნენ: ინაწილებდნენ პასუხისმგებლობასა და მართვის სადავეებს, ერთნაირად განიცდიდნენ ყოველ წარმატებასა და წარუმატებლობას. გარდა Microsoft-ისა, პოლ ალენს სხვა ბიზნესებიც ჰქონდა, მათ შორის, სპორტული გუნდის მფლობელი იყო და აქტიურად ეწეოდა საქველმოქმედო საქმიანობასაც.

"ჩვენ მთელ თავისუფალ დროს ერთად ვატარებდით და ვუჩხიკინებდით ნებისმიერ კომპიუტერს, რომელიც ხელში მოგვხვდებოდა", - აგრძელებს წერას გეიტსი. Microsoft-ის მფლობელი ამბობს, რომ პოლ ალენი იყო ის ადამიანი, რომელიც მაშინვე ხვდებოდა, რამდენად დიდი წარმატება ელოდა კომპიუტერულ ტექნოლოგიებს. მისი თქმით, ალენმა ზუსტად იცოდა, როგორ უნდა განვითარებულიყო ეს სფერო.

"პოლის გარეშე Microsoft ვერასდროს დაიბადებოდა. 1974 წლის დეკემბერში მე და ის ბოსტონში ვცხოვრობდით. პოლი მუშაობდა, მე კი კოლეჯში ვსწავლობდი. ერთ დღეს მან მომაკითხა და იქვე მდებარე გაზეთების ჯიხურთან გამაქანა. როდესაც ადგილზე მივედით, პოლმა Popular Electronics-ის მთავარი გვერდი მაჩვენა, სადაც ახალი კომპიუტერის, Altair 8800-ის შესახებ ეწერა. მან შემომხედა და მითხრა: იცი, მეგობარო, ეს ყველაფერი ჩვენ გარეშე ხდება. სწორედ იმ მომენტში გადავწყვიტე კოლეჯის მიტოვება და მთელი დრო ჩვენი ახალი კომპანიის, Microsoft-ის შექმნას შევალიეთ. ეს პოლის დამსახურებით მოხდა", - წერს ბილ გეიტსი.

მსოფლიოს უმდიდრესი ადამიანი პოლ ალენზე საუბრისას აღნიშნავს, რომ მის მეგობარს ძალიან რთული საგნების მარტივად ახსნის უნიკალური ნიჭი ჰქონდა.

"ძალიან გამიმართლა, რომ მას ასე ადრეული ასაკიდან ვიცნობდი. გაცილებით უფრო ადრე, ვიდრე მთელი მსოფლიო გაიცნობდა. მახსოვს, ერთხელ ჩემთვის ცნობილი სიმღერა Are You Experienced? დაუკრა. მაშინ არანაირი გამოცდილება არ მქონდა ცხოვრებაში. ყველაფერი მასთან ერთად შევიძინე"

წერილის ბოლოს ბილ გეიტსი აღნიშნავს, რომ პოლის გარდაცვალებამ დიდი ტკივილი მიაყენა. "ის გაცილებით მეტ დროს იმსახურებდა ცხოვრებაში, რომელსაც მაქსიმალურად ეფექტურად გამოიყენებდა. ძალიან, ძალიან მომენატრება", - წერს გეიტსი.

პოლ ალენი 2018 წლის 15 ოქტომბერს, 65 წლის ასაკში გარდაიცვალა.