ფაშისტური მოძრაობის, საქართველოს ეროვნული ერთობის ლიდერის, გიორგი ჭელიძის სასამართლო პროცესი ადვოკატების სიმრავლის გამო დიდ დარბაზში გადაიტანეს. დარბაზის შეცვლის შუამდგომლობა ადვოკატებმა დააყენეს. ჭელიძეს მინიმუმ 15 ადვოკატი იცავს.

ერთ-ერთი ადვოკატის თქმით, ადვოკატების რეკორდული რაოდენობის მიზეზი მაღალი საზოგადოებრივი ინტერესია, რადგან ჭელიძის დაკავებით ეროვნულობას საფრთხე ექმნება.

მოძრაობის წევრებმა პროცესის დაწყების წინ ტრადიციულად, ფაშისტური მისალმება გაიმეორეს.

პროცესის დაწყებამდე სასამართლოს ეზოში აქცია გაიმართა. ფაშისტური მოძრაობის წევრებმა და გიორგი ჭელიძის მხარდამჭერებმა განაცხადეს, რომ ის პოლიტიკური პატიმარია და მისი დაუყოვნებლივ გათავისუფლება მოითხოვეს. მათ მიაჩნიათ, რომ ჭელიძის უფლებები ირღვევა.

გიორგი ჭელიძე ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვა-ტარების ბრალდებით დააკავეს. 3 სექტემბერს თბილისის საქალაქო სასამართლომ, გიორგი ჭელიძეს აღკვეთის ღონისძიების სახით პატიმრობა შეუფარდა.