"დამტკიცდა, რომ ზაზა სარალიძე არ იტყუებოდა", — ასე შეაფასა On.ge-სთან საუბარში ხორავას ქუჩაზე მოკლული დავით სარალიძის მამამ რუსთავი 2-ის მიერ გავრცელებული ფარული ჩანაწერი, სადაც სავარაუდოდ, მირზა სუბელიანი ხელისუფლებასთან გარიგებასა და კომპრომატებზე საუბრობს.

სარალიძემ აღნიშნა, რომ თვეების განმავლობაში საუბრობდა იმაზე, რომ სუბელიანს მამხილებელი საბუთები ჰქონდა, რითიც ხელისუფლებას აშანტაჟებდა. მისი თქმით, ფარულ ჩანაწერში გაჟღერებულ ყველა თემაზე ჰქონდა ინფორმაცია, გარდა შინაგან საქმეთა მინისტრის მოადგილის, ლევან კაკავას საქმეში მონაწილეობისა.

როგორც სარალიძემ On.ge-ს განუცხადა ამ ეტაპზე მას ახალი სამოქმედო გეგმა არ აქვს და ის აგრძელებს აქციებს. მისი თქმით, არ აქვს მოლოდინი, რომ ამ ჩანაწერების შემდეგ ხელისუფლებას სწორი რეაგირება ექნება.

"ხელისუფლებიდან მხოლოდ იმ რეაგირებას ველოდები, რომ დაიწყებენ თავის მართლებას და ეცდებიან თავი გამოიძვრინონ ამ სიბინძურიდან, მაგრამ ესენი თავს ვეღარ გამოიძვრენენ", — აცხადებს სარალიძე.

"მირზა სუბელიანის ჩანაწერები"

გუშინ, 14 ოქტომბერს რუსთავი 2-ის მიერ გავრცელებულ აუდიოჩანაწერში, რომლის ავთენტურობა ჯერ არაა დადგენილი, სავარაუდოდ, ხორავას ქუჩის საქმეზე დანაშაულის შეუტყობინებლობისთვის დაკავებული მირზა სუბელიანის საუბარია ასახული. ჩანაწერის მიხედვით, ის ჰყვება, რომ ქართული ოცნების უკანონო საქმიანობის დამადასტურებელი უზარმაზარი რაოდენობის მტკიცებულებები აქვს დაარქივებული. კერძოდ, საუბარია ადამიანთა გატაცებასა და წამებაზე.

აუდიოჩანაწერში, სავარაუდოდ, სუბელიანი საუბრობს ხორავას ქუჩის საქმეზეც. კერძოდ, ყვება გამოძიების პროცესში დაშვებული შეცდომების შესახებ. "[ხორავას ქუჩის საქმეზე] ვისაც ხელი დავაფარე, ისინი, ორივე მაგრად არიან", — ამ ტექსტით საუბრობს, სავარაუდოდ, სუბელიანი ჩანაწერში.

აუდიოჩანაწერის ამავე ფრაგმენტში ისმის, რომ ხორავას ქუჩის საქმეში მონაწილე ბავშვები სამართალდამცავებმა სცმეს.

"მეორე შემთხვევას გეტყვი, რისი პაბლაშკა, ბო..შვილი ვიყო, ლამის ბუქნებს მაკეთებინებდნენ, ღამე წაიყვანეს, რაზე მაქ ზაზაზე აკრეფილი, მოიპარეს ბავშვები, მე ირაკლისაც ვუთხარი და მამის თვალწინ ცემეს, უძინართა მზეში ხდება და ერთად ერთი ჩვენ ცხონებულ საქმე, გამოსავალი მითხარიო, იმან რო მითხრა, რავი ძმაო, ამ სიტუაციაში მე გამოსავალს ვერ ვხედავმეთქი, რა, იმიტო, რო სახელმწიფო გადარჩეს ჩაჯექიო, ჩავჯექი ეგრევე".

საქართველოს პროკურატურამ გამოძიება დაიწყო საუბრის უკანონოდ ჩაწერის საქმეზე. ამ ეტაპამდე უცნობია გამოიძიებს თუ არა უწყება საუბრის შინაარსს.

პროკურატურაში ამბობენ, რომ გამოძიება 12 ოქტომბერს დაიწყო, თუმცა საგამოძიებო მოქმედებების შესახებ 14 ოქტომბერს, რუსთავი 2-ის მიერ ჩანაწერის გავრცელების შემდეგ გაავრცელა ინფორმაცია. გამოძიება პატიმრობაში მყოფი პირის კერძო საუბრის უნებართვო ჩაწერის საქმეზეა დაწყებული.

ქართული ოცნების დეპუტატმა, ვიქტორ ჯაფარიძემ On.ge-სთან საუბრისას დაადასტურა, რომ ხორავას ქუჩის საქმეზე დანაშაულის შეუტყობინებლობისთვის დაკავებულ მირზა სუბელიანს საპატიმრო დაწესებულებაში შეხვდა და ეს საუბარი მათ შორის შედგა.

გაიგეთ მეტი: