ქართული ოცნების მიერ მხარდაჭერილი კანდიდატის, სალომე ზურაბიშვილის შემომწირველ ექიმებს ბანკში სესხები აქვთ. ამის შესახებ სიუჟეტი ტელეკომპანია რუსთავი 2-ზე, შაბათის კურიერში პირად წყაროებზე დაყრდნობით გავიდა.

რუსთავი 2-ის ინფორმაციით, მათ ექიმების საბანკო ამონაწერები კონფიდენციალურმა წყარომ მიაწოდა, რომლის მიხედვითაც არც ერთი მედიკოსის საბანკო ანგარიშზე დანაზოგი არ ჰქონდათ.

კურიერის მიერ მოპოვებული ინფორმაციით, ღუდუშაურის კლინიკის ექიმმა, მანანა მახარაძემ, სალომე ზურაბიშვილს 2 ოქტომბერს 5 ათასი ლარი შესწირა, 2016 წელს კი ქართულ ოცნებას — 20 ათასი ლარი. დოკუმენტებით, რუსთავი 2-ის ჟურნალისტმა გაარკვია ისიც, რომ ექიმ მახარაძეს ბანკში ორი კრედიტი აქვს და ხელფასიდან ნაწილს ამ ვალდებულების შესასრულებლად იყენებს.

ლელა ჩხიკვაძე ღუდუშაურის კლინიკის ექიმია, რომელმაც სალომე ზურაბიშვილს 5 ათასი ლარი გადაურიცხა. კურიერის ცნობით, მის საბანკო ამონაწერში რამდენიმე მოქმედი სესხი და საკრედიტო ბარათი ფიქსირდება.

ექიმი ამბობს, რომ მისივე სურვილით, ქალური სოლიდარობის მიზნით გადაურიცხა ზურაბიშვილს თანხა: "მიუხედავად იმისა, რომ მე მაქვს კრედიტი, ჩემი დანაზოგიც მაქვს".

სიუჟეტის მიხედვით, ჩაჩავას ექიმი, ნიკოლოზ ქსნელაშვილის საბანკო ვალდებულება 100 ათასს აჭარბებს. ჩაჩავას კლინიკის გინეკოლოგმა სალომე ზურაბიშვილს 8 ათასი, ქართულ ოცნებას კი 40 ათასი ლარი გადაურიცხა.

"ის არის განათლებული ქალბატონი, აზროვნებს ექსტრაორდინალურად, სიმპათიური ქალბატონია. ბევრ რამეში არ ვეთანხმები მას, მაგრამ ეს იმას არ ნიშნავს, რომ მხარს არ ვუჭერ. ბევრი რაღაცები მომწონს, მაგრამ არის რაღაცებიც, მაგალითად მისი მოქართულეობა, რაღაც სიტყვები ეშლება. ეს არ ნიშნავს რომ ის საქართველოს მოღალატედ მივიჩნიო. მე კრედიტი გარკვეული საჭიროებისთვის ავიღე და არა იმისთვის, რომ მე მიჭირს", — ამბობს ნიკოლოზ ქსნელაშვილი.

კურიერთან საუბრისას ერთ-ერთი ექიმის ახლობელი ამბობს, რომ ექიმებს სამსახურიდან გაშვებით ემუქრებოდნენ, თუ ფინანსურ ოპერაციაში მონაწილეობას არ მიიღებდნენ. სიუჟეტში ნათქვამია, რომ სავარაუდოდ, სამედიცინო კლინიკების მფლობელის, ელგუჯა გოცირიძის ფინანსები გადაარიცხინეს ექიმებს, სალომე ზურაბიშვილის ანგარიშზე.

ამავე თემაზე: