პარლამენტის თავმჯდომარის პირველმა მოადგილემ, თამარ ჩუგოშვილმა სტრასბურგში ვიზიტისას განაცხადა, რომ რუსეთის გასვლა ევროსაბჭოდან არავის უნდა, რადგან მასზე სტრასბურგის სასამართლოს მოთხოვნები აღარ გავრცელდება.

"ჩვენ გვინდა, რომ რუსეთი დარჩეს ევროსაბჭოში იმიტომ, რომ სტრასბურგის სასამართლოს, როგორც მექანიზმის გამოყენება შეგვეძლოს რუსეთის წინააღმდეგ", — აღნიშნა ჩუგოშვილმა.

საქართველოს საპარლამენტო დელეგაციის ხელმძღვანელის თქმით, მეორე მხრივ, რუსეთმა თავისი ვალდებულებები უნდა შეასრულოს და საწევრო გადაიხადოს, რასაც ჯერჯერობით არ აკეთებს. ჩუგოშვილმა აღნიშნა, რომ ამის გამო შესაძლოა რუსეთის გარიცხვის საკითხი დადგეს, თუმცა საერთო ამოცანა ისაა, რომ რუსეთმა ნაკისრი ვალდებულებების შესრულება დაიწყოს.

ჩუგოშვილის თქმით, ევროსაბჭომ სწორი გადაწყვეტილება მიიღო, როდესაც არ გაიტანა ის რეზოლუცია, რომელიც შემოთავაზებული იყო.

რეზოლუცია, რომელიც ევროსაბჭოში (PACE) რუსეთისთვის სანქციების მოხსნის შესაძლებლობას იძლეოდა, ავტორმა უკან გაიწვია. მინიმუმ ერთი წლის განმავლობაში რუსეთს არ აღუდგება ხმის უფლება ევროსაბჭოში. შესაძლოა, დოკუმენტი უახლოეს პლენარულ სხდომაზე, 2019 წლის იანვარში განიხილონ. ამ ეტაპზე კი რეზოლუცია კომიტეტებში დაბრუნდა. რუსეთი ევროსაბჭოს გადაწყვეტილებით უკმაყოფილოა.

რუსეთის დელეგაციას ევროსაბჭოში ხმის მიცემის უფლება 2014 წელს, ყირიმის ანექსიის შედეგად შეუჩერდა. ამის გამო რუსეთმა ევროსაბჭოს დაფინანსებასა და საპარლამენტო ასამბლეის მუშაობაში მონაწილეობაზე უარი თქვა.
.