სავარაუდოდ დედამიწის ზურგზე არ მოიძებნება ადამიანი, რომელსაც ერთხელ მაინც არ წაუმღერია ან არ იცის იდინა მენზელის let it go, რომელიც ანიმაციური ფილმ Frozen-ის სავიზიტო ბარათად იქცა და 2014 წელს საუკეთესო სიმღერის კატეგორიაში ოსკარიც მიიღო.

წლის მულტფილმად დასახელდა და ოქროს ქანდაკების მფლობელი გახდა თავად ანიმაციაც, რომელიც დღემდე დიდი პოპულარობით სარგებლობს, მისმა შემოსავალმა კი დისნეის ყველა რეკორდი მოხსნა და კომპანიის ყველაზე შემოსავლიანი პროდუქტი გახდა, რომელმაც ჯამში ერთ მილიარდ დოლარზე მეტი მოგება ნახა.

როგორც ანიმაციის პროდიუსერი ამბობს, არც ერთი დღე არ გავა ისე, რომ ფანებისგან წერილი არ მიიღოს, სადაც ძირითადად ანიმაციის მეორე ნაწილის გადაღებას ითხოვენ. სულ ცოტა ხნის წინ კი ერთ-ერთმა სცენარისტმა ჯენიფერ ლიმ Frozen 2 დააანონსა და განმარტა, რომ ეს იქნება სრულყოფილი ფილმი, რომელიც ერთნაირად დაიპყრობს როგორც პატარების ისე ზრდასრული მაყურებლის გულს:

“დედოფალ ელზასა და პრინცესა ანას ისტორიას საოცარი დასასრული ელოდება. თუმცა ეს რა თქმა უნდა დიდ დროს მოითხოვს. გადაღებები ჯერ არც კი დაწყებულა. სცენარზე მუშაობა კი იქამდე გაგრძელდება, სანამ სათქმელს ბოლომდე არ გადმოვცემთ”, თქვა ჟურნალისტებთან საუბრის დროს ჯენიფერ ლიმ.

Frozen 2-ზე დისნეის შემოქმედებითი გუნდი სერიოზულად მუშაობს, რათა დარწმუნდნენ რომ ის ისეთივე კარგი და წარმატებული იქნება როგორიც პირველი ნაწილი.

“როდესაც შენ უკვე გაქვს ერთი წარმატებული ფილმი და გიჩნდება სურვილი გქონდეს მეორეც, დიდხანს ფიქრობ თუ რა უნდა უთხრას ახალი ამ ფილმმა მაყურებელს, რა იქნებოდა მნიშვნელოვანი, რა იქნებოდა უფრო მიმზიდველი და ვფიქრობ ვიპოვნე კიდეც”, ამბობს ლი.

მიუხედავად იმისა, რომ ფილმის შემქმნელები ახალ ისტორიას საიდუმლოდ ტოვებენ, ფანებს საკუთარი მოსაზრებები უკვე აქვთ. მას შემდეგ რაც Frozen-ის პირველი ნაწილი გამოვიდა, გულშემატკივართა ნაწილმა პეტიციაც კი შეიმუშავა, რომ იმ შემთხვევაში თუ ანიმაციის მეორე ნაწილი გამოვიდოდა მთავარი პერსონაჟი დედოფალი ელზა ლესბოსელი ყოფილიყო. მოთხოვნამ საკმაოდ მასშტაბური სახე მიიღო და სხვადასხვა პოპულარული გამოცემები აქტიურად წერენ იმაზე, თუ რამდენად მნიშვნელოვანი და ისტორიული ფაქტი იქნება თუ დისნეი ერთ-ერთ ყველაზე პოპულარულ და წარმატებულ ანიმაციაში ლგბტ თემატიკას შეიტანს.

სანამ დირექტორი კრის ბაკი და სცენარისტი ჯენიფერ ლი ფილმის სპეციფიკის შემუშავებას აგრძელებენ. ინტერნეტ სივრცეში ფანების ყურადღება ყველაზე მეტად ანას და ელზას იდეალური დუეტი იპყრობს და ამბობენ, რომ ეს დუეტი კვლავ მოიპოვებს მსოფლიო წარმატებას.