2019 წლის სახელმწიფო ბიუჯეტის პროექტის მიხედვით, საქართველოს პარლამენტის დაფინანსება 2 605 000 ლარით იზრდება. აქედან შრომის ანაზღაურების გაზრდას 1 705 600 ლარი მოხმარდება. ხელფასების ზრდასთან ერთად მომუშავეთა რიცხვი კი უცვლელი რჩება.

ფინანსთა მინისტრის მოადგილის, გიორგი კაკაურიძის განმარტებით, საქართველოს პარლამენტის ბიუჯეტს მთავრობა არ გეგმავს და ბიუჯეტის პროექტზე მუშაობის პროცესში თუ პარლამენტი ბიუჯეტს შეცვლის, ახალ ბიუჯეტშიც შეცვლილი თანხები აისახება.

"პარლამენტს ბიუჯეტი უკვე დამტკიცებული აქვს მიმდინარე წლის ივნისში და სწორედ ეს მონაცემებია ასახული ბიუჯეტის პროექტში",- განაცხადა მინისტრის მოადგილემ.

სექტემბერში ცნობილი გახდა, რომ საქართველოს პარლამენტი ქუთაისიდან თბილისში საბოლოოდ 2019 წლის იანვრიდან გადავა. პარლამენტის გადატანის მიზეზი უმრავლესობის დეპუტატების განმარტებით, ხარჯების ოპტიმიზაცია იყო.

კითხვაზე, რატომ ზრდის დაფინანსებას პარლამენტი, როცა ხარჯების შემცირებაზეა საუბარი, უმრავლესობის დეპუტატი, ადამიანის უფლებათა კომიტეტის თავმჯდომარე სოფო კილაძე ამბობს, რომ ბიუჯეტის პროექტს დეტალურად არ იცნობს და დაფინანსების ზრდის შესახებ ინფორმაცია არ აქვს.

"მე აქცენტი გავაკეთე ადამიანის უფლებების ნაწილში, რადგან ამ კომიტეტში განვიხილავთ ბიუჯეტის პროექტს, სხვა საკითხებში ჩასახედად დროც არ მქონდა სიმართლე გითხრათ. პლენარული სხდომისთვის უკეთესად მოვემზადებით",- განაცხადა სოფო კილაძემ.

საქართველოს პარლამენტი ქვეყნის მთავარ ფინანსურ დოკუმენტის, ბიუჯეტის განხილვა დაიწყო. დღეს, 9 ოქტომბერს ბიუჯეტის პროექტს ადამიანის უფლებათა დაცვისა და თავდაცვისა და უშიშროების კომიტეტში განიხილავენ.

ამავე თემაზე: