საფრანგეთის პარიზ-საკლეის უნივერსიტეტში ერთ-ერთმა მეცნიერმა ადამიანის თითის მსგავსი უცნაური მოწყობილობა MobiLimb შექმნა, რომელიც თქვენს მობილურში ერთდება. მეცნიერი თავის ქმნილებას ბერლინში გამართულ ერთ-ერთ კონფერენციაზე ოქტომბერში წარადგენს.

MobiLimb-ს ხუთი მაღალი სიზუსტის ძრავა აქვს, რომლის საშუალებითაც ის სხვადასხვა მრავალფეროვან მოძრაობასა და ფუნქციას ასრულებს.

ხელოვნურ თითს სხვადასხვა ემოჯის გაცოცხლება შეუძლია - გაღიმებული ემოჯის მიღებისას ხელოვნური თითი ხელის გულზე მოგიღუტუნებთ, ან მოგეფერებათ, რამაც შეიძლება სმაილების გამოყენება უფრო სახალისო გახადოს.

თითს კიდევ ერთი საინტერესო ფუნქცია აქვს - გადაადგილება. ამიერიდან შეგეძლებათ, რომ თქვენს ტელეფონს დაუძახოთ და უყუროთ თუ როგორ მობობღავს ის თქვენამდე.

თუმცა ერთადერთი რეალური გამოყენება, რაც ამ უცნაურ გამოგონებას შეიძლება ჰქონდეს, სმარტფონის სადგამია - ხელოვნურ თითს შეუძლია სმარტფონი კომფორტულ პოზიციაში დააფიქსიროს, რაც ვიდეოების ყურებას უფრო სასიამოვნოს ხდის, თუმცა ასეთი სადგამები უკვე არსებობს და ისინი ბევრად უფრო სასიამოვნოდ გამოიყურება, ვიდრე ეს მოწყობილობა.

MobiLimb-ს რამდენიმე სხვადასხვა ფორმა შეგვიძლია "ჩავაცვათ," რომლითაც მას ადამიანის თითს, ან ცხოველის კუდს მივამსგავსებთ, ეს თქვენს გემოვნებაზეა დამოკიდებული.

გამომგონებლის თქმით, მისი მიზანი სმარტფონების შესაძლებლობების გაფართოება იყო.

"რეალურ ცხოვრებაში ადამიანები ერთმანეთს ემოციების დიდ ნაწილს შეხებით ვუზიარებთ, ჩვენი მიზანი იყო შეგვექმნა მოწყობილობა, რომელიც შორ მანძილზე შეხების ემოციის გადაცემას მოახერხება," - ამბობენ მეცნიერები.