ინფექციური პათოლოგიის, შიდსის და კლინიკური იმუნოლოგიის ცენტრის ინფორმაციით, 2018 წლის პირველი ოქტომბრის მონაცემებით აივ ინფიცირებულთა 517 ახალი შემთხვევაა დაფიქსირებული. შარშან შესაბამის პერიოდში 468 შემთხვევა გამოვლინდა.

ცენტრის ცნობით, ბოლო წლებში აივ ინფექცია/შიდსის ახალ შემთხვევათა ანალიზის შედეგად, ახალ შემთხვევათა სტაბილური ზრდის ტენდენცია შეინიშნება.

სტატისტიკის თანახმად, 2018 წლის პირველი ოქტომბრის მონაცემებით, საქართველოში სულ რეგისტრირებულია 7 283 აივ ინფიცირებული პირი. მათ შორის 5 445 კაცია, 1 838 კი ქალი. პაციენტთა უმრავლესობა 29-დან 39 წლამდეა.

რეგისტრირებულ შემთხვევათა განაწილება გადაცემის გზების მიხედვით ასეთია:

  • 46% დაინფიცირდა ჰეტეროსექსუალური კონტაქტის შედეგად;
  • 40,4% ნარკოტიკების ინექციური მომხმარებელი;
  • 11% კაცები რომელთაც სექსი აქვთ კაცთან;
  • 1,4% დაინფიცირდა ვერტიკალური გადაცემის გზით;
  • 0,7% გადაცემის გზა დაუდგენელია;
  • 0,5% სისხლის რეციპიენტია.

აივ ინფიცირების ყველაზე მეტი შემთხვევა რეგისტრირებულია:

  • თბილისში (2662 შემთხვევა);
  • სამეგრელოში 924 (აქედან ზუგდიდი - 608);
  • იმერეთში 906 (ქუთაისი 437);
  • აჭარაში 818 (ბათუმი — 515);
  • აფხაზეთში (461);
  • კახეთში (350);
  • ქვემო ქართლში (378);
  • შიდა ქართლში (272);
  • გურიაში (155);
  • ფოთში (110);
  • სამცხე-ჯავახეთში (102).

საქართველოს მოქალაქეებისთვის აივ კონსულტირება-ტესტირება კონფიდენციალურია და უფასო. შიდსის ცენტრის მისამართია: თბილისი, ალ. ყაზბეგის 16, მე-8 კორპუსი. ცხელი ხაზი: 239-80-18.