ვიკილიქსის დამფუძნებელი და მთავარი რედაქტორი, ჟულიან ასანჟი გამომძიებელი ჟურნალისტების საერთაშორისო კონსორციუმს აკრიტიკებს და პანამის დოკუმენტების ბოლომდე გამოქვეყნებისკენ მოუწოდებს. მისი თქმით, ორგანიზაცია ისევე უნდა მოიქცეს, როგორც ვიკილიქსი იქცევა და საზოგადოებას დოკუმენტების შესწავლის საშუალება დაუბრკოლებლად უნდა მისცეს.

კონსორციუმმა მოპოვებული მასალის მხოლოდ 1% გამოაქვეყნა საჯაროდ, დანარჩენი 99% მხოლოდ კონსორციუმის პარტნიორი ჟურნალისტებისთვისაა ხელმისაწვდომი, რომლებიც ამ მასალებზე მუშაობენ და მოპოვებულ ინფორმაციას საზოგადოებას აცნობენ.

ICIJ-ს (ჟურნალისტთა კონსორციუმი) დირექტორი ჯერარდ რულე აცხადებს, რომ მისი ორგანიზაცია დოკუმენტებს არ გამოაქვეყნებს, რადგან გარდა კორუფციული და საეჭვო საქმიანობისა, ამ დოკუმენტებში სხვა, ლეგიტიმური და კანონიერი ოპერაციებიცაა ასახული და იმ ადამიანებს, რომლებსაც დანაშაული არ ჩაუდენიათ, საფრთხის ქვეშ არ დააყენებს.

"ჩვენ არ ვართ ვიკილიქსი, ჩვენ გვჯერა და გვინდა ვაჩვენოთ საზოგადოებას, რომ ჟურნალისტიკას პასუხისმგებლობით უნდა მოვეკიდოთ," - განაცხადა რულემ ჟურნალ Wired-თან ინტერვიუში.

ასანჟიმ რულეს ტვიტერზე უპასუხა:

"#PanamPapers: თუ დოკუმენტების 99%-ზე მეტს აცენზურებ, ჟურნალისტიკის მხოლოდ 1%-ში ხარ ჩართული."

მანამდე ასანჟიმ ტვიტერზე გამოკითხვა გამოაქვეყნა, მან სოციალური ქსელის მომხმარებლებს ჰკითხა, უნდა გამოქვეყნებულიყო თუ არა პანამის დოკუმენტები ყველასთვის ხელმისაწვდომად.

გამოკითხვაში 86 ათასზე მეტმა ადამიანმა მიიღო მონაწილეობა და 95% მიიჩნევს, რომ დოკუმენტები მთლიანად უნდა გამოქვეყნდეს.