საქართველოს პროკურატურამ ომეგა ჯგუფის საქმეზე 2018 წლის 12 სექტემბერს დაწყებულ გამოძიებას დამატებით გავრცელებული ჩანაწერებიც დაურთო. ამის შესახებ პროკურატურის განცხადებაშია ნათქვამი.

უწყების ცნობით, ამ ეტაპზე სხვადასხვა მედიასაშუალებიდან გამოთხოვილი აუდიოჩანაწერების ავთენტურობისა და მონაწილე პირთა იდენტიფიცირების მიზნით დანიშნულია შესაბამისი ექსპერტიზები. ასევე, მიმდინარეობს ჩანაწერებში სავარაუდოდ მონაწილე პირების გამოკითხვის პროცესი.

პროკურატურის მიერ გავრცელებულ განცხადებაში ნათქვამია, რომ თბილისის პროკურატურაში გამოსაკითხად დაბარებულია ომეგა ჯგუფის ხელმძღვანელი ზაზა ოქუაშვილი, თუმცა მისი ადვოკატის განცხადებით, იგი იმყოფება დიდ ბრიტანეთში და მიმდინარე თვის ბოლოს, საქართველოში დაბრუნების შემდეგ გამოცხადდება საგამოძიებო ორგანოში. ასევე, საზღვარგარეთ იმყოფება საუბრის კიდევ ერთი სავარაუდო მონაწილე სპორტის ყოფილი მინისტრი, ირაკლი ჩოგოვაძე.

თბილისის პროკურატურის ინფორმაციით, გამოკითხვის მიზნით, 2018 წლის 25 სექტემბერს, მოწმის სახით გამოიძახეს ომეგა ჯგუფში შემავალი სამი კომპანიის დირექტორი, თუმცა მათი ადვოკატის ცნობით, აღნიშნული პირები უწყებაში მითითებულ დროს ვერ მივიდოდნენ და ისინი საგამოძიებო ორგანოში 2018 წლის 27 სექტემბერს გამოცხადდებიან.

ამასთან, გამოძიებამ, ომეგა ჯგუფში შემავალი კომპანიების საგადასახადო ვალდებულებების დადგენის მიზნით, საქართველოს ფინანსთა სამინისტროს სსიპ შემოსავლების სამსახურიდან უკვე გამოითხოვა შესაბამისი ინფორმაცია.