საქართველოს ძიუდოისტთა ნაკრების კაპიტანი ვარლამ ლიპარტელიანი მსოფლიო ჩემპიონატის ფინალშია. სპორტსმენი ბაქოში მიმდინარე მსოფლიო ჩემპიონატის მეექვსე დღეს 100 კილოგრამ წონით კატეგორიაში ოტგონბაატარ ლხარგვასურენის დაუპირისპირდა.

ლიპარტელიანმა ვაზაარი ბრძოლის დასრულებამდე 20 წამით ადრე მოიპოვა. მსოფლიო ჩემპიონატის დასკვნით შეხვედრაში ქართველი ფალავანი კორეელ გუჰნამ ჩოსა და რუს ნიაზ ილიასოვს შორის გამარჯვებულს შეხვდება.

ვარლამ ლიპარტელიანმა ნახევარფინალამდე სამი ბრძოლა მოიგო – პირველ შეხვედრაში მან ფრანგი ალექსანდრ იდირი დაამარცხა. მერვედფინალში ლიპარტელიანს აზერბაიჯანელთა ბოლო იმედი, ელმარ გასიმოვი შეხვდა, რომელიც იპონით დაამარცხა. ქართველმა იპონით დაასრულა მეოთხედფინალური ბრძოლაც, რომელშიც ეგვიპტელ რამადან დარვიშს მოუგო.