დიდი ბრიტანეთის პრემიერ-მინისტრმა, ტერეზა მეიმ განაცხადა, რომ ბრექსტისის საკითხის მოლაპარაკებების დროს ევროკავშირი ბრიტანეთს "პატივისცემით" უნდა მოექცეს. ამ განცხადებით მეიმ ევროკავშირის ლიდერებს უპასუხა, რომლებმაც ბრექსიტის მის გეგმას შეუსრულებელი უწოდეს.

პრემიერი ლიდერების გადაწყვეტილებას მიუღებელს უწოდებს. მისივე თქმით, ევროკავშირს კონტრწინადადებები არ წარმოუდგენია.

20 სექტემბერს ევროკავშირის ლიდერების შეხვედრა ბრექსიტის გეგმის განსახილველად ზალცბურგში შედგა. შეხვედრის შემდეგ ევროსაბჭოს პრეზიდენტმა, დონალდ ტუსკმა განაცხადა, რომ ტერეზა მეის გეგმის შესრულება შეუძლებელია.

დიდი ბრიტანეთის პრემიერ-მინისტრმა განაცხადა, რომ არც ქვეყნის გახლეჩას და არც რეფერენდუმის შედეგების გაუქმებას არ აპირებს.

ტერეზა მეის გეგმის მთავარი არსია, რომ ბრექსიტის შემდეგ ევროკავშირმა და დიდმა ბრიტანეთმა საერთო სავაჭრო წესებს მიაღწიონ. ტუსკის თქმით, მეის შემოთავაზებები ევროკავშირის სხვა წევრებს არ აწყობთ, პირველ რიგში, ეკონომიკური მიზეზების გამო.

"ამ ხნის განმავლობაში მე პატივისცემით ვეპყრობოდი ევროკავშირს. დიდი ბრიტანეთიც მსგავს დამოკიდებულებას ელის, რადგან ამაზეა დამოკიდებული რამდენად კარგი ურთიერთობა გვექნება მოლაპარაკებების დასრულების შემდეგ", — განაცხადა მეიმ.

ცალკე საკითხად დგას ევროკავშირის წევრის, ირლანდიისა და დიდ ბრიტანეთში შემავალი ჩრდილოეთ ბრიტანეთის საზღვრის საკითხი. ამ ეტაპზე საზღვარი სრულიად ღიაა. ევროკავშირი სთავაზობს დიდ ბრიტანეთს, რომ ჩრდილოეთ ირლანდია დატოვოს საერთო ეკონომიკურ სფეროში ირლანდიასთან ერთად, რითაც მკაცრ სასაზღვრო კონტროლს აიცილებს თავიდან. ამ გეგმას არ იზიარებს დიდი ბრიტანეთი.