ევროკავშირის საბჭოს პრეზიდენტის, დონალდ ტუსკის თქმით, პრემიერ-მინისტრის, ტერეზა მეის გეგმა ევროკავშირიდან ბრიტანეთის გასვლის შესახებ ევროკავშირის ქვეყნების მიერ არ შეიძლება მიღებულ იქნას, რადგან ევროპული ბაზრის ერთიანობას არღვევს.

20 სექტემბერს ევროკავშირის 27 ქვეყნის ლიდერები ზალცბურგში ბრექსიტის საკითხს განიხილავდნენ. სხდომის შემდეგ დონალდ ტუსკმა მედიასთან შედეგებზე ისაუბრა. მისი თქმით, ბრიტანეთის მთავრობაში შემუშავებული ბრექსიტის გეგმა შეუსრულებელია.

ტერეზა მეის გეგმის მთავარი არსია, რომ ბრექსიტის შემდეგ ევროკავშირმა და დიდმა ბრიტანეთმა საერთო სავაჭრო წესებს მიაღწიონ. ტუსკის თქმით, მეის შემოთავაზებები ევროკავშირის სხვა წევრებს არ აწყობს, პირველ რიგში, ეკონომიკური მიზეზების გამო.

საფრანგეთის პრეზიდენტმა, ემანუელ მაკრონმა ბრექსიტის მომხრეები გააკრიტიკა და მათ მატყუარები უწოდა.

"ბრექსიტმა გვაჩვენა, რომ ისინი, ვინც ამბობს, რომ ევროპის გარეშე ცხოვრება შეუძლიათ და ყველაფერი კარგად იქნება, ბევრი ფული იქნება - ყველანი მატყუარები არიან", — განაცხადა მაკრონმა.

ზალცბურგში, ასევე, ირლანდიისა და ჩრდილოეთ ირლანდიის საზღვრის საკითხზეც იმსჯელეს. ამ ეტაპზე მათ შორის მკაცრი სასაზღვრო კონტროლი არ არის, რადგან ირლანდია ევროკავშირის წევრია.

ევროკავშირი სთავაზობს დიდი ბრიტანეთს, რომ ჩრდილოეთ ირლანდია დატოვოს საერთო ეკონომიკურ სფეროში ირლანდიასთან ერთად, რითაც მკაცრ სასაზღვრო კონტროლს აიცილებს თავიდან. სხვა ქვეყნებისთვის, რომლებიც დიდი ბრიტანეთის შემადგენლობაში არიან, მსგავსი ნორმა არ იმოქმედებს. დიდი ბრიტანეთის მთავრობას კი მიაჩნია, რომ ევროკავშირთან საერთო სავაჭრო წესების შემუშავება "ირლანდიის საკითხისთვის" ერთადერთი გამოსავალია.