გიორგი მარგველაშვილმა განაცხადა, რომ ე.წ ციანიდის საქმეზე ბრალდებულის, დეკანოზ გიორგი მამალაძის შეწყალების საკითხის შესულია კომისიაში და კომისიასთან ერთად განიხილავს. ამის შესახებ მან ინგა გრიგოლიას გადაცემა რეაქციაში ისაუბრა.

ჟურნალისტის კითხვაზე შეიწყალებენ თუ არა მამალაძეს მარგველაშვილი პასუხობს:

"ვივარაუდოთ, რომ განხილვის პროცესშია და შესაბამისად მიღებული იქნება გადაწყვეტილება".

ციანიდის საქმე

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.