პარლამენტის დეპუტატი ევროპული საქართველოდან , ოთო კახიძე მარიხუანის სამართლებრივ რეგულაციას მხარს უჭერს და ამბობს, რომ მისი მოხმარება გარკვეული პროფესიის ადამიანებისთვის აკრძალული უნდა იყოს.

"საჯარო ადგილებში ცხადია უნდა იყოს აკრძალული, ამაზე უნდა იყოს სასჯელი. ავტომობილის ან ნებისმიერი სხვა სატრანსპორტო საშუალების მართვა მარიხუანის თრობის მდგომარეობაში, ასევე, უნდა იყოს დასჯადი", - განაცხადა კახიძემ.

5 სექტემბერს ცნობილი გახდა, რომ შინაგან საქმეთა სამინისტრო მარიხუანის მოხმარების მკაცრ სამართლებრივ ჩარჩოებში მოსაქცევად კანონპროექტზე მუშაობს.

შსს გეგმით, პირი მარიხუანის მოხმარებისთვის დაისჯება თუ მოხმარება ხდება:

  • საზოგადოებრივი თავშეყრის ნებისმიერ ადგილას;
  • ყველა სახის საზოგადოებრივ ტრანსპორტში;
  • არასრულწლოვნის თანდასწრებით;
  • სასწავლო-საგანმანათლებლო დაწესებულების, 18 წლამდე ასაკის პირებისთვის განკუთვნილი სხვა დაწესებულების შენობა-ნაგებობებში და მათ საკუთრებაში არსებულ ტერიტორიებზე;
  • არასრულწლოვნებისთვის განკუთვნილ საზოგადოებრივ შეკრებებზე ან მათ მიმდებარე ტერიტორიაზე განსაზღვრულ რადიუსში;
  • სამსახურებრივი მოვალეობის შესრულებისას გარკვეული პროფესიის ადამიანებისთვის (მაგალითად, პედაგოგებისთვის, ექიმებისთვის, საჯარო მოხელეებისთვის);

კანონპროექტით შსს გეგმავს, რომ გარკვეული პროფესიის ადამიანებს მარიხუანის მოხმარებისთვის ჩამოერთმევათ პროფესიული საქმიანობის უფლება და შეეზღუდებათ სამოქალაქო უფლებები. თუმცა, ჯერ პროფესიები დაკონკრეტებული არ არის.

30 ივლისს საკონსტიტუციო სასამართლომ პარტია გირჩის წევრების სარჩელი დააკმაყოფილა, რითაც მარიხუანის მოხმარებისთვის ადმინისტრაციული სასჯელის გააუქმა. სასამართლოს ამ შემთხვევაში არ უმსჯელია მარიხუანის მოპოვების გზებზე.