რუსეთის ოთხი მოქალაქე, რომელთაც საქართველოში დაგეგმილ კრემლის მიერ დაფინანსებულ ფორუმში უნდა მიეღოთ მონაწილეობა, ქვეყანაში არ შემოუშვეს. მიზეზი რამდენიმე წლის წინ დარღვეული საქართველოში მოქმედი ოკუპაციის შესახებ კანონია. ინფორმაცია On.ge-ს შინაგან საქმეთა სამინისტროში დაუდასტურეს.

უწყებაში რუსეთში გაბრუნებული პირების ვინაობას არ ასახელებენ, თუმცა რუსთავი 2-ის ცნობით, ესენი არიან რუსეთის სახელმწიფო საინფორმაციო სააგენტოს "იტარტასის" სამხედრო კორესპონდენტი ვიქტორ ლიტოვკინი, საზოგადოების მკვლევართა ასოციაციის საერთაშორისო საბჭოს პრეზიდენტი, გენადი ბოდრიუგოვი, ბატონი ტოკარევი და ალან კასევი.

5-7 სექტემბერს საქართველოში რუსეთის პრეზიდენტის საგრანტო ფონდის მიერ დაფინანსებული "სამხრეთ კავკასიის საერთაშორისო კონფერენცია" იმართება.

რუსული პროპაგანდისტული მედიის მთავარი სახეები, კრემლთან დაახლოებული სამხედრო და პოლიტიკური მიმომხილველებთან ერთად, საქართველოს დედაქალაქში მედიაფორუმის ჩასატარებლად ჩამოვიდნენ. აღნიშნული ღონისძიებაც თავად კრემლიდან, კონკრეტულად კი ვლადიმერ პუტინის საპრეზიდენტო გრანტითაა დაფინანსებული.

ფორუმზე, რომელიც სამი დღე გაგრძელდება, ელოდებიან ტელეკომპანია ცარგრადის აქტიურ მიმომხილველს, დიმიტრი კოსირევს. მას არაერთი პუბლიკაცია აქვს გამოქვეყნებული, სადაც საუბარია, იყო თუ არა რუსული ოკუპაცია შეცდომა. ის, ამავდროულად, ამბობ, რომ ახლანდელი დე ფაქტო რეალობა საქართველომ უნდა მიიღოს და ამ ფორმით გააგრძელოს რუსეთთან ურთიერთობა.