ჯანდაცვის სამინისტროს განცხდაებით, 3 სექტემბრიდან ქრონიკული დაავადებების სამკურნალო მედიკამენტებით უზრუნველყოფის პროგრამა ფართოვდება. ამის შესახებ უწყებამ დღეს, 31 აგვისტოს განცხადება გაავრცელა, სადაც ნათქვამია, რომ პრეპარატებზე ფასები პენსიონერებისა და შშმ პირებისათვის შემცირდება.

სამინისტროს ცნობით, აღნიშნულ ჯგუფებს, ყველაზე გავრცელებული ქრონიკული დაავადებების სამკურნალო მედიკამენტებზე საბაზრო ღირებულების 50% და მეტი ოდენობის ფასდაკლება შეეხებათ.

ფასდაკლება ვრცელდება შემდეგი დაავადებების სამკურნალო საშუალებებზე:

  • გულ-სისხლძარღვთა სისტემის დაავადებები;
  • დიაბეტის ტიპი 2 (არაინსულინდამოკიდებული);
  • ფარისებრი ჯირკვლის დაავადებები;
  • ფილტვის ქრონიკული დაავადებები.

მედიკამენტების ფასდაკლებით შესაძენად ბენეფიციარმა უნდა გაიაროს შედეგი პროცედურები:

  1. მიმართოს ოჯახის/სოფლის ექიმს ან ექიმ-სპეციალისტს ფორმა #100-სა და რეცეპტის მისაღებად;
  2. სოციალური მომსახურების სააგენტოს ნებისმიერ ფილიალში აღნიშნული დოკუმენტაციისა და პირადობის მოწმობის წარდგენით გაიაროს პროგრამაში რეგისტრაცია;
  3. მოქალაქეს შეუძლია ფასდაკლებული მედიკამენტები შეიძინოს სააფთიაქო ქსელ PSP-ს შესაბამის ფილიალში რეცეპტისა და პირადობის მოწმობის წარდგენით.

ბენეფიციარს შესაძლებლობა აქვს ერთჯერადად შეიძინოს მედიკამენტის მაქსიმუმ სამი თვის სამყოფი ოდენობა.

პროგრამის ფარგლებში გასაცემი მედიკამენტების ნუსხა იხილეთ აქ.