FIFA-ს ეთიკის კომიტეტის წევრის იურისტი ხუან პედრო დამიანის საქმიანობასთან დაკავშირებით ორგანიზაციამ შიდა მოკვლევა დაიწყო.

პანამის დოკუმენტების გამოქვეყნების შემდეგ, დამიანისა და ფიფას ყოფილი ვიცე-პრეზიდენტის ეუგენიო ფიგურედოს კავშირები გამოაშკარავდა. ფიგურედო აშშ-ს ძალოვნებმა დააპატიმრეს 2015 წლის მაისში, ციურხში ჩატარებული სპეცოპერაციის შედეგად. მას ფულის გათეთრებასა და ქრთამის აღებაში ედება ბრალი.

მოსაკ ფონსეკადან გაჟონილ დოკუმენტებში ჩანს, რომ ხუან პედრო დამიანი და მისი ფირმა იურიდიულ მომსახურებას უწევდნენ დაპატიმრებულ ჩინოვნიკთან დაკავშირებულ შვიდ ოფშორულ კომპანიას.

ფიფაში ოფიციალურად ადასტურებენ, რომ აღნიშნულ საქმეზე წინასწარი მოსმენები უკვე ჩანიშნულია და შესაბამისმა ორგანოებმა მოკლვევა დაიწყეს.

ჟურნალისტებისთვის ხელმისაწვდომი გახდა იურიდიული ფირმა მოსაკ ფონსეკას საიდუმლო დოკუმენტები. 11 მილიონ საბუთში ცხადად ჩანს, თუ როგორ იყენებდნენ მსოფლიოს ცნობილი პოლიტიკოსები და ბიზნესმენები ე.წ. საგადასახადო სამოთხეებს (ოფშორულ ზონებს) ფულის გასათეთრებლად და გადასახადებისგან თავის ასარიდებლად. გამოჟონილი დოკუმენტების რაოდენობა კოლოსალურია.

იურიდიული ფირმის შიდა ბაზიდან 2.6 ტერაბაიტის მოცულობის 11.5 მილიონი დოკუმენტია ამოღებული, რაც ბევრად მეტია, ვიდრე 2010 წლის ვიკილიქსის ან 2013 წლის სნოუდენის დოკუმენტები.