შავი ზღვის საერთაშორისო უნივერსიტეტის მხარდასაჭერად დღეს, 27 აგვისტოს, 18 საათზე მთავრობის კანცელარიასთან აქცია გაიმართება. აქციაზე "დადექი IBSU-ს გვერდით, დადექი განათლების დასაცავად!" უნივერსიტეტისთვის სტუდენტების მიღების ერთი წლით შეზღუდვას გააპროტესტებენ.

"ეს არ არის მხოლოდ ერთი უნივერსიტეტის მძიმე მდგომარეობაში ჩაყენება, ეს არის საზოგადოებრივი მნიშვნელობის საკითხი - საგანმანათლებლო საქმიანობის შეზღუდვა დაუშვებელია დემოკრატიულ ქვეყანაში, ვინაიდან ეჭვქვეშ დგება ქვეყნის საერთაშორისო რეპუტაციაც, იმ 20-ზე მეტ ქვეყნის წინაშე, რომლებთანაც IBSU თანამშრომლობს", - წერენ აქციის ორგანიზატორები.

შავი ზღვის საერთაშორისო უნივერსიტეტს სტუდენტების მიღების უფლება ერთი წლის ვადით შეეზღუდა. უმაღლესი საგანმანათლებლო დაწესებულებების ავტორიზაციის საბჭოს მიერ 2018 წლის 20 აგვისტოს მიღებული გადაწყვეტილებით, მიუხედავად იმისა, რომ სასწავლებელს ავტორიზაცია 6 წლით გაუგრძელდა, ისინი წელს სტუდენტებს ვერ მიიღებენ. იმ აბიტურიენტებმა, რომლებსაც შავი ზღვის საერთაშორისო უნივერსიტეტში ჩაბარება სურთ, არჩევანი 27 აგვისტოს 18 საათამდე უნდა შეცვალონ.

ავტორიზაციის შეჩერების მიზეზად უნივერსიტეტის ფინანსური პრობლემები, კერძოდ საგადასახადო ჯარიმა, 700 ათასი ლარი დასახელდა, რაც უნივერსიტეტმა გუშინ, 26 აგვისტოს გადაიხადა. განათლების ხარისხის განვითარების ეროვნული ცენტრის განცხადებით, შავი ზღვის საერთაშორისო უნივერსიტეტმა ჯარიმის გადახდის შემდეგ სააპელაციო საბჭოს უნდა მიმართოს.

IBSU-ს მხარდასაჭერად აქციები 21 და 23 აგვისტოსაც გაიმართა.