შავი ზღვის საერთაშორისო უნივერსიტეტის მხარდასაჭერად განათლებისა და მეცნიერების სამინისტროსთან აქცია იმართება. აქციის ორგანიზატორები განათლების ხარისხის განვითარების ეროვნული ცენტრის ავტორიზაციის საბჭოს მიერ მიღებულ გადაწყვეტილებას აპროტესტებენ, რომლის მიხედვითაც IBSU-ს სტუდენტების მიღების უფლება ერთი წლით შეეზღუდა.

ფოტო: გიორგი შეყელაძე / On.ge

ავტორიზაციის საბჭოს გადაწყვეტილებით, შავი ზღვის საერთაშორისო უნივერსიტეტს ავტორიზაცია 6 წლით გაუგრძელდა, თუმცა სასწავლებელი 2019 წლის 20 აგვისტომდე სტუდენტებს ვერ მიიღებს.

IBSU-ში მიაჩნიათ, რომ საბჭოს გადაწყვეტილება არაა ადეკვატური და მას უსაფუძვლოს და უსამართლოს უწოდებენ. ამის მიზეზებად უნივერსიტეტში ასახელებენ შემდეგს:

  • შავი ზღვის საერთაშორისო უნივერსიტეტის უძრავი ქონება და სხვა აქტივები მრავალჯერ აღემატება 700 000 ლარს;
  • ავტორიზაციის საბჭოს მიერ მიღებული გადაწყვეტილება მხოლოდ მიმდინარე წელს 2 მილიონ ლარამდე ამცირებს უნივერსიტეტის შემოსავალს (რაც მრავალფეროვან საგანმანათლებლო მიზნებს მოემსახურებოდა).

განათლების ხარისხის განვითარების ეროვნული ცენტრის განმარტებით, ფინანსურმა პრობლემებმა, რომელთა წინაშეც შავი ზღვის უნივერსიტეტი დგას, შესაძლოა სასწავლო პროცესები სერიოზული რისკების წინაშე დააყენოს.

საქართველოს განათლების სამინისტროს განცხადებით, იმ აბიტურიენტებისთვის, რომლებსაც შავი ზღვის საერთაშორისო უნივერსიტეტში ჩაბარება სურთ, რიგგარეშე მობილობა გამარტივებული წესით გამოცხადდება. ეს ნიშნავს, რომ ისინი სხვა ავტორიზებულ საგანმანათლებლო დაწესებულებებს აირჩევენ და ახალ სასწავლო წელს დანარჩენ სტუდენტებთან ერთად დაიწყებენ.