ვაკის საცურაო აუზსს ქალი მომხმარებლებისთვის განსხვავებული შეზღუდვა აქვს. აუზის ტერიტორიაზე, ქალების გასახდელში, კედელზე გამოკრულ განცხადებაში წერია: "ძვირფასო ქალბატონებო, კრიტიკულ დღეებში აუზში ჩასვლა აკრძალულია".

აუზის ერთ-ერთმა თანამშრომელმა On.ge-თან სატელეფონო საუბრისას განმარტა, რომ მათი ყველა მომხმარებელი, განურჩევლად სქესისა, ერთი და იგივე საფასურს იხდის ყოველთვიურად, ანუ რამდენიმედღიანი შეზღუდვის მიუხედავად, განსხვავებული ტარიფები ქალებისთვის არ არის:

"ეს არ არის ერთკვირიანი პერიოდი, ყველას სხვადასხვა რაოდენობით აქვს და ამ დროს მხოლოდ აუზში ჩასვლა ეკრძალებათ, დანარჩენი ყველა მომსახურების მიღება შეუძლიათ".

ქალთა უფლებადამცველი, იურისტი ბაია პატარაია აღნიშნულს ქალების მიმართ დისკრიმინაციად აფასებს და ამბობს, რომ ქალის ბუნებრივი მდგომარეობის მიზეზით არ უნდა ხდებოდეს აუზით სარგებლობის აკრძალვა:

"ქალის აუზზე არ შეშვება იმ მიზეზით, რომ თვიური აქვს, დისკრიმინაციული დამოკიდებულებაა ქალის მიმართ, ვინაიდან ეს არის ქალების ჯანმრთელობისთვის ბუნებრივი მოვლენა. ადამიანები, რომლებიც ვარჯიშობენ, იქნებიან ისინი სპორტსმენები თუ არასპორტსმენები, რომლებიც სპორტულ ცხოვრებას ეწევიან, არ წყვეტენ ვარჯიშს თვიურის გამო და ბუნებრივია, არ შეიძლება ამის გამო ქალებს აუკრძალო აუზზე ცურვა. ეს არის ქალის ბუნებრივი მდგომარეობა, მისი ჯანმრთელობისა და სხეულის შემადგენელი ნაწილი და ამ ნიშნით დისკრიმინაცია არ უნდა ხდებოდეს".

ვაკის საცურაო აუზის ადმინისტრაციის მიერ გამოკრული განცხადება ფეისბუკით სოფო ტაბატაძემ გაავრცელა.