თბილისის სახელმწიფო უნივერსიტეტის რექტორის თანამდებობის დასაკავებლად არჩევნების გამოცხადების, კანდიდატთა რეგისტრაციის დაწყებისა და კანდიდატის შერჩევის შესახებ დადგენილება 8 აგვისტოს გამოიცა.

განცხადების თანახმად, კანდიდატთა რეგისტრაცია დაიწყება თბილისის სახელმწიფო უნივერსიტეტში 2016 წლის 9 სექტემბრის 10:00 საათიდან, მისამართზე: ქ. თბილისი, ი. ჭავჭავაძის გამზირი №1, ოთახი №114. განცხადებების მიღების ბოლო ვადად განისაზღვრა 2016 წლის 14 სექტემბრის 18:00 საათი.

რექტორობის მსურველთა მიერ წარმოდგენილ განცხადებებს განიხილავს აკადემიური საბჭო და კონკურსის საფუძველზე 2016 წლის 23 სექტემბერს შეარჩევს.

რექტორის თანამდებობის დასაკავებლად კონკურსში მონაწილეობის მიღება შეუძლია
პირს, რომელსაც აქვს დოქტორის ან მასთან გათანაბრებული აკადემიური ხარისხი.

უნივერსიტეტის მიერ გავრცელებულ განცხადებაში წერია, რომ კანდიდატმა სარეგისტრაციოდ უნდა წარადგინოს:

  1. უმაღლესი განათლების დამადასტურებელი მოწმობის ასლი (დოქტორის ან მასთან
    გათანაბრებული აკადემიური ხარისხი);
  2. უნივერსიტეტის განვითარების სამოქმედო გეგმა და კონცეფცია;
  3. პირადობის დამადასტურებელი მოწმობის ასლი;
  4. ავტობიოგრაფია (CV);
  5. 2 ფერადი ფოტოსურათი, ზომით 3/4–ზე;
  6. ცნობა ნასამართლეობის შესახებ;
  7. ცნობა ნარკოლოგიური შემოწმების შესახებ.