Wizz Air რეისიდან მოხსნილი აუტისტური სპექტრის მქონე ბავშვს და მშობელ ბოდიშს უხდის. კომპანიის განცხადებით, ინციდენტის თაობაზე აეროპორტის პერსონალის მხრიდან Wizz Air-ის სათავო ოფისის დროული ინფორმირება ვერ მოხერხდა. მათი თქმით, ავიახომალდის ეკიპაჟმა დამოუკიდებელად მიიღო გადაწყვეტილები მგზავრთა რეისიდან მოხსნის თაობაზე.

კომპანიაში აცხადებენ, რომ Wizz Air ყველაფერს გააკეთებს იმისათვის, რომ აღნიშნულმა მგზავრებმა ყველანაირი დანახარჯის გარეშე შეძლონ მათთვის სასურველი უახლოესი რეისით გამგზავრება.

აუტისტური სპექტრის მქონე ბავშვის მშობელმა, ნანა ანთიძემ On.ge-ს უთხრა, რომ აეროპორტის ადმინისტრაციის წარმომადგენლებმა რეგისტრაციის უფლება არ მისცეს, როდესაც დაინახეს, რომ ბავშვი გაღიზიანებული იყო.

როგორც დედა ყვება, მისი შვილი გაღიზიანებული გაფრენამდე იყო. მისი თქმით, რეგისტრაციის დასრულებამდე და ფრენამდე ორი საათით ადრე ბავშვი უკვე დამშვიდებული იყო, რაც ექიმებმა წერილობითაც დაუდასტურეს. მისივე თქმით, ფრენამდე, როდესაც ბავშვი უკვე დამშვიდებული იყო, მისი მდგომარეობის სანახავად არავინ მისულა, არც ექიმის წერილობითი დასტური უნახავს ვინმეს.

როგორც აეროპორტების გაერთიანება აცხადებს, ბავშვის შეტევას შეესწრო ხომალდის მეთაური. მათი თქმით, მეთაურმა სამედიცინო ცნობა ინგლისურ ენაზე მოითხოვა იმის დასადასტურებლად, რომ ბავშვისთვის ფრენა საშიში არ არის და არც სხვა მგზავრებს შეუქმნიდა ფრენისას დისკომფორტს.

"ბუნებრივია, აეროპორტის ექიმის კომპეტენცია მსგავსი ცნობის გაცემისგან მოკლებულია. თავად ბავშვის მშობელს კი ბავშვის ჯანმრთელობის შესახებ ცნობა არ გააჩნდა. შესაბამისად, ავიაკომპანიის ხომალდის მეთაურმა ბორტზე მგზავრის დაშვებისგან თავი შეიკავა", - ნათქვამია განცხადებაში.

როგორც აეროპორტების გაერთიანებაში On.ge-ს განუმარტეს, იმისათვის რომ ნანა ანთიძემ გაფრენა შეძლოს ბავშვის ჯანმრთელობის შესახებ ცნობა ინგლისურ ენაზე უნდა წარადგინოს, რადგან ეკიპაჟის მეთაურმა ინგლისური იცის და საბოლოო გადაწყვეტილება მასზეა.