აუტიზმის სპექტრის მქონე ბავშვი და მისი მშობელი, რომლებიც ბავშვის გაღიზიანების გამო ბორტზე არ აუშვეს, შემდეგი რეისით, 26 აგვისტოს ათენში უფასოდ გაფრინდებიან. ამის შესახებ ინფორმაცია On.ge-ს საქართველოს აეროპორტების გაერთიანებამ მიაწოდა.

ბავშვის დედის ნანა ანთიძე თქმით, 23 აგვისტოს ქუთაისის საერთაშორისო აეროპორტში თვითმფრინავში არ აუშვეს, რადგანაც ფრენამდე მისი შვილი გაღიზიანებული იყო. ისინი საბერძნეთში ცხოვრობენ და სწორედ იქ აპირებდნენ დაბრუნებას.

ანთიძის თქმით, ისინი ბორტზე ავიაკომპანია Wizz Air-მა არ აუშვა. ასევე, აეროპორტის ადმინისტრაციის წარმომადგენლებმა რეგისტრაციის უფლება არ მისცეს, როდესაც დაინახეს, რომ ბავშვი გაღიზიანებული იყო.

როგორც დედა ყვება, მისი შვილი გაღიზიანებული გაფრენამდე იყო. მისივე თქმით, რეგისტრაციის დასრულებამდე და ფრენამდე ორი საათით ადრე ბავშვი უკვე დამშვიდებული იყო, რაც ექიმებმა წერილობითაც დაუდასტურეს, თუმცა ისინი თვითმფრინავში მაინც არ აუშვეს.

მისი თქმით, ფრენამდე, როდესაც ბავშვი უკვე დამშვიდებული იყო, მისი მდგომარეობის სანახავად არავინ მისულა, არც ექიმის წერილობითი დასტური უნახავს ვინმეს:

"თვითონ ექიმი დავალაპარაკე პილოტს, რომ ბავშვი დაწყნარებულია და მოდით, ნახეთ. არავინ არ გამომეხმაურა. მომხსნეს რეისიდან და პასუხიც ვერ მივიღე... ბავშვი დამეღუპება ამ ვითარებაში, იქ ჰყავს პირადი ექიმი, იქ ვცხოვრობთ, ახლა ეწყებათ სკოლა და სპეციალური კურსები".

ნანა ანთიძე ითხოვდა, რომ 26 აგვისტოს, უახლოესი რეისით გაფრენის საშუალება მიეცათ, თუმცა ამისთვის დამატებითი თანხის გადახდა მოსთხოვეს.

საქართველოს აეროპორტების გაერთიანება მომხდარი ფაქტი დაადასტურა. მათი განმარტებით, ბავშვის შეტევას შეესწრო ხომალდის მეთაური და ბორტზე მის ასაყვანად შესაბამისი სამედიცინო დასკვნა მოითხოვა.

როგორც აეროპორტების გაერთიანება აცხადებს, ეკიპაჟის მეთაურმა მოითხოვა შესაბამისი სამედიცინო ცნობა ინგლისურ ენაზე, რომ ბავშვისთვის ფრენა საშიში არ არის და არც სხვა მგზავრებს შეუქმნიდა ფრენისას დისკომფორტს.

"ბუნებრივია, აეროპორტის ექიმის კომპეტენცია მსგავსი ცნობის გაცემისგან მოკლებულია. თავად ბავშვის მშობელს კი ბავშვის ჯანმრთელობის შესახებ ცნობა არ გააჩნდა. შესაბამისად, ავიაკომპანიის ხომალდის მეთაურმა ბორტზე მგზავრის დაშვებისგან თავი შეიკავა", - ნათქვამია განცხადებაში.