რუსეთის ცენტრალურმა ბანკმა ოქროს შესყიდვას მკვეთრად მოუმატა. როგორც Bloomberg წერს, რუსეთი ამით აშშ-ის ახალი სანქციებისთვის ემზადება.

მსოფლიო სავალუტო ფონდის ინფორმაციით, ივლისში რუსეთმა 26,1 ტონა ოქრო შეიძინა. საბოლოოდ ქვეყნის ოქროს რეზერვმა 2 710 ტონას მიაღწია, რაც 77 მილიარდ დოლარზე მეტადაა შეფასებული.

გარდა ამისა, გამოცემა წერს, რომ რუსეთმა შეამცირა ინვესტიციები ამერიკულ ფასიან ქაღალდებში, რაც ნიშნავს, რომ ისინი თავიდან იშორებენ ამერიკულ აქტივებს.

სკრიპალების საქმის გამო 22 აგვისტოდან ძალაში შევიდა აშშ-ის მიერ რუსეთისთვის დაწესებული ახალი სანქციების პირველი ნაწილი. ამერიკის შეერთებული შტატები აცხადებს, რომ რუსეთის მთავრობამ ქიმიური იარაღი გამოიყენა, ყოფილი რუსი აგენტის, სერგეი სკრიპალისა და მისი შვილის მოსაწამლად, რის გამოც მოსკოვისთვის სანქციების დაწესებას გეგმავს.