ბოლო ვიზიტიდან 10 წლის შემდეგ გერმანიის კანცლერი ანგელა მერკელი საქართველოში ჩამოდის. საქართველოს საგარეო საქმეთა მინისტრის დავით ზალკალიანის განცხადებით, ანგელა მერკელის ვიზიტი დადასტურებაა, თუ რამდენად მნიშვნელოვანი ადგილი უჭირავს საქართველოს გერმანიის პოლიტიკურ დღის წესრიგში.

"ეს არის კიდევ ერთხელ მხარდაჭერა საქართველოს ხელისუფლების მიერ განხორციელებული რეფორმების, ასევე, იმ საგარეო პოლიტიკური კურსის, რომელსაც საქართველოს ხელისუფლება ატარებს, არის მხარდაჭერა საქართველოს ევროპული და ევროატლანტიკური ინტეგრაციის, ასევე, საქართველოს სამშვიდობო პოლიტიკის", - განაცხადა მინისტრმა.

დავით ზალკალიანის თქმით, ვიზიტის ფარგლებში, შეხვედრებისას საუბარი იქნება როგორც ორმხრივი ურთიერთობის საკითხებზე, ასევე მრავალმხრივ ფორმატებში თანამშრომლობაზე. განსაკუთრებული ყურადღება დაეთმობა ეკონომიკურ განზომილებას.

"აუცილებელია, რომ ჩვენი ეკონომიკური თანამშრომლობის დონე იყოს შესაბამისობაში საგარეო და თავდაცვის სფეროში თანამშრომლობის პროცესებთან. გარდა ამისა, მნიშვნელოვანია, რომ ეს ვიზიტი არის რეგიონალური ხასიათის, რეგიონში მნიშვნელოვანი ინფრასტრუქტურული პროექტები ხორციელდება და ამ თვალსაზრისითაც, საქართველოს განსაკუთრებული ადგილი უკავია და ეს ვიზიტი კიდევ ერთხელ იქნება ხაზგასმა იმისა, რომ საქართველოს მნიშვნელოვანი ადგილი აქვს დათმობილი გერმანიის პოლიტიკურ დღის წესრიგში", - აღნიშნა მინისტრმა.

გერმანიის კანცლერი ანგელა მერკელი საქართველოს ორდღიანი ვიზიტით, ხვალ 23 აგვისტოს ეწვევა. გერმანიის კანცლერს თბილისის შოთა რუსთაველის საერთაშორისო აეროპორტში საქართველოს საგარეო საგარეო საქმეთა მინისტრი დავით ზალკალიანი დახვდება, რის შემდეგაც დახვედრის ოფიციალური ცერემონია მთავრობის ადმინისტრაციაში გაიმართება. გერმანიის კანცლერი საქართველოს პრემიერ-მინისტრ მამუკა ბახტაძეს პირისპირ, ასევე, გაფართოებულ ფორმატში შეხვდება. შეხვედრის შემდეგ კი, ანგელა მერკელი და მამუკა ბახტაძე ერთობლივ პრესკონფერენციას გამართავენ.

ვიზიტის პირველივე დღესაა დაგეგმილი გერმანიის კანცლერის შეხვედრა საქართველოს პრეზიდენტ გიორგი მარგველაშვილთანაც, რის შემდეგაც ანგელა მერკელი გმირთა მემორიალს გვირგვინით შეამკობს. ასევე, 23 აგვისტოს გაიმართება ოფიციალური სადილი საქართველოს პრემიერ-მინისტრ მამუკა ბახტაძის სახელით.

ანგელა მერკელი შეხვედრებს თბილისში ვიზიტის მეორე დღეს, 24 აგვისტოსაც გამართავს, მათ შორის დაგეგმილია გერმანიის კანცლერის შეხვედრები ოპოზიციის წარმომადგენლებსა და სწავლება „ღირსეული პარტნიორის“ მონაწილე გერმანელ ჯარისკაცებთან.