შავი ზღვის საერთაშორისო უნივერსიტეტის მხარდასაჭერად 23 აგვისტოს, 18:00 საათზე განათლებისა და მეცნიერების სამინისტროსთან აქცია გაიმართება.

აქციის ორგანიზატორები განათლების სამინისტროსთან განათლების ხარისხის განვითარების ეროვნული ცენტრის ავტორიზაციის საბჭოს მიერ მიღებულ გადაწყვეტილებას გააპროტესტებენ, რომლის მიხედვითაც IBSU-ს სტუდენტების მიღების უფლება ერთი წლით შეეზღუდა.

აქციის ორგანიზატორები საზოგადოებას მოუწოდებენ მივიდნენ აქციაზე და იბრძოლოთ იმ უფლებისთვის, რომელსაც "განათლება და თავისუფალი არჩევანი ჰქვია".

შავი ზღვის უნივერსიტეტის საზოგადოებასთან ურთიერთობის სამსახურის ცნობით, უნივერსიტეტს 2013 წელს საგადასახადო ჯარიმა დაეკისრა. ჯარიმის ოდენობა 700 ათასი ლარია და მისი სამართლიანობის შესახებ ამჟამად სასამართლო დავა მიმდინარეობს. ჯარიმის გამო უნივერსიტეტის ქონებას ყადაღა ადევს. უნივერსიტეტის პრესსამსახურის თქმით, სასამართლო დავის წაგების შემთხვევაში ისინი მზად არიან, დაფარონ საგადასახადო ჯარიმა. უნივერსიტეტის ადმინისტრაციამ დოკუმენტებიც გამოაქვეყნა, სადაც ჩანს რომ დავალიანების დასაფარად თანხები მობილიზებულია.

IBSU-ში მიაჩნიათ, რომ საბჭოს გადაწყვეტილება არაა ადეკვატური და მას უსაფუძვლოს და უსამართლოს უწოდებენ. ამის მიზეზებად უნივერსიტეტში ასახელებენ შემდეგს:

  • შავი ზღვის საერთაშორისო უნივერსიტეტის უძრავი ქონება და სხვა აქტივები მრავალჯერ აღემატება 700 000 ლარს;
  • ავტორიზაციის საბჭოს მიერ მიღებული გადაწყვეტილება მხოლოდ მიმდინარე წელს 2 მილიონ ლარამდე ამცირებს უნივერსიტეტის შემოსავალს (რაც მრავალფეროვან საგანმანათლებლო მიზნებს მოემსახურებოდა).

განათლების ხარისხის განვითარების ეროვნული ცენტრის განმარტებით, ფინანსურმა პრობლემებმა, რომელთა წინაშეც შავი ზღვის უნივერსიტეტი დგას, შესაძლოა სასწავლო პროცესები სერიოზული რისკების წინაშე დააყენოს.

"იმისათვის, რომ გათვალისწინებული იყოს სტუდენტთა ინტერესები, მათთვის სასწავლო პროცესთან დაკავშირებით რისკების თავიდან ასაცილებლად, უნივერსიტეტს სტუდენტების მიღების უფლება 1 წლის ვადით შეეზღუდა", - განაცხადეს ხარისხის განვითარების ეროვნულ ცენტრში.

საქართველოს განათლების სამინისტროს განცხადებით, იმ აბიტურიენტებისთვის, რომლებსაც შავი ზღვის საერთაშორისო უნივერსიტეტში ჩაბარება სურთ, რიგგარეშე მობილობა გამარტივებული წესით გამოცხადდება. ეს ნიშნავს, რომ ისინი სხვა ავტორიზებულ საგანმანათლებლო დაწესებულებებს აირჩევენ და ახალ სასწავლო წელს დანარჩენ სტუდენტებთან ერთად დაიწყებენ.