ცენტრალურ ავტომაგისტრალზე ავარიის შედეგად ერთი პირი დაშავდა, რვა მანქანა კი დაზიანდა. დაშავებული ამჟამად საავადმყოფოშია გადაყვანილი.

როგორც On.ge-ს შინაგან საქმეთა სამინისტროში განუცხადეს, ქვეითად მოსიარულე პირს მსუბუქი ავტომანქანა დაეჯახა. შეჯახების შედეგად ავტომობილის უკან შვიდი მანქანა დაზიანდა, თუმცა არცერთი მგზავრი არ დაშავებულა.

უწყების ცნობით, მოძრაობა მაგისტრალზე ოდნავაა შენელებული და მოძრაობას საპატრულო ეკიპაჟები არეგულირებენ.

მომხდარზე გამოძიება საქართველოს სისხლის სამართლის კოდექსის 276-ე მუხლის პირველი ნაწილითაა დაწყებული. აღნიშნული მუხლით, სატრანსპორტო საშუალების მოძრაობის უსაფრთხოების ან ექსპლუატაციის წესის დარღვევა, რამაც ჯანმრთელობის ნაკლებად მძიმე დაზიანება გამოიწვია, ისჯება ჯარიმით ან შინაპატიმრობით ვადით ექვსი თვიდან ორ წლამდე ანდა თავისუფლების აღკვეთით ვადით სამ წლამდე.