მეუფე იაკობი აცხადებს, რომ პატრიარქს დეკანოზი გიორგი მამალაძე დამნაშავე ჰგონია:

"არ გვინდოდა, რომ ეს თემა ძალიან გახმაურებულიყო და თუ არ მოისვენებენ ისინი, ვინც მას [გიორგი მამალაძეს] იცავენ თვითონაც გაეხვევიან შარში".

მისი თქმით, მეუფე გრიგოლმა პირად საუბარში უთხრა, რომ დეკანოზს დამნაშავედ მიიჩნევს. პატრიარქის ქორეპისკოპოსი აცხადებს, რომ გიორგი მამალაძეს დეკანოზის წოდება უნდა ჩამოერთვას:

"ეკლესიას რომ გვჯეროდეს, რომ უდანაშაულოა, ჩვენ გამოვიყვანდით აქამდე".

პირველ აგვისტოს ცნობილი გახდა, რომ უზენაესმა სასამართლომ დეკანოზი გიორგი მამალაძის საქმე წარმოებაში არ მიიღო. მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა.