ხორავას ქუჩაზე მოკლული დავით სარალიძის მამა, ზაზა სარალიძე და სპეცოპერაციის შედეგად გარდაცვლილი თემირლან მაჩალიკაშვილის მამა, მალხაზ მაჩალიკაშვილი ჟურნალისტ ელისო კილაძესთან ერთად ევროპის სასამართლოში წარსადგენად საქართველოს წინააღმდეგ სარჩელის მომზადებას გეგმავენ. ამის შესახებ ელისო კილაძემ საერთო ბრიფინგზე განაცხადა.

მისი თქმით, სარჩელის მომზადებამდე ევროპის სასამართლოში საინფორმაციო შეხვედრები გაიმართება.

"ჩვენ ვაპირებთ ოფიციალური წერილით მივმართოთ როგორც შინაგან საქმეთა სამინისტროს, ისე სახელმწიფო უსაფრთხოების სააგენტოს, რომ წერილობით მივიღოთ პასუხი ხომ არ არსებობს რაიმე ტიპის შემაფერხებელი გარემოება ჩვენს მიერ საზღვრის კვეთასთან დაკავშირებით, ბილეთების ასლებსაც ვაბარებთ, რომ რაიმე კითხვები არ დაგვრჩეს. დაგეგმილია ევროპელ ადვოკატებთან შეხვედრა", - განაცხადა ელისო კილაძემ.

კილაძის განმარტებით, ევროპის სასამართლოში წარსადგენ სარჩელზე ევროპელი და ქართველი ადვოკატები ერთად იმუშავებენ.

"ეს ხელისუფლებას დააფიქრებს, რომ რადიკალური ნაბიჯები გადადგან, რომ ობიექტური ჭეშმარიტება როგორც ერთ ისე მეორე საქმეზე დადგინდეს", - განაცხადა ელისო კილაძემ.

ზაზა სარალიძის თქმით, მან საქართველოში სამართლიანობას ვერ მიაღწია და ახლა დახმარებას მთელ მსოფლიოს სთხოვს.

"წესით არ უნდა გვიწევდეს გარეთ გასვლა. ვაპირებთ მივმართოთ არა მარტო ევროპის სასამართლოს, არამედ მთელ მსოფლიოს დახმარებისთვის. დღესაც ცდილობენ პროკურორები საქმის შეკერვას", - განაცხადა ზაზა სარალიძემ.

მალხაზ მაჩალიკაშვილის თქმით, ის რაც მოხდა პანკისის ხეობაში უნდა დასახელდეს არა სპეცოპერაციად, არამედ ტერაქტად.

"მგონია, რომ ამას მივაღწევთ. დასრულდეს პანკისის ხეობაში თავიანთი ბინძური თამაშებისთვის პანკისის ხეობაში მაცხოვრებელი ქისტების, რომლებიც დღესაც დიდი ზეწოლის ქვეშ არიან ძალოვნების მხრიდან. ისინი ახდენენ ადამიანების შუაზე გახლეჩას და დაპირისპირების გაღვივებას, ეს კი არასდროს მოხდება", - განაცხადა თემირლან მაჩალიკაშვილმა.