შახტის მართვა სახელმწიფოს საქმე ნამდვილად არ არის, - ასე უპასუხა საქართველოს პრემიერ-მინისტრმა მამუკა ბახტაძემ საქნახშირის შეთავაზებას შახტის სახელმწიფოსთვის გადაცემის შეთავაზებაზე.

პრემიერის თქმით, ისეთ მნიშვნელოვან და სასიცოცხლო აქტივს, როგორადაც საქართველოში შეიძლება ჩავთვალოთ ქვანახშირის მოპოვება, უნდა ჰქონდეს გრძელვადიანი სტრატეგია.

"ჩვენთვის ძალიან მნიშვნელოვანი სექტორია, თუმცა ადამიანის სიცოცხლესა და უსაფრთხოებაზე მაღლა ვერაფერს დავაყენებთ. ამიტომ მივიღე ის გადაწყვეტილება, რომელიც მივიღე - რომ ყველა შახტი უნდა იყოს დალუქული მანამ, ვიდრე ჩვენ არ მივიღებთ კონკრეტულ დასკვნას ორი მიმართულებით", - განაცხადა მამუკა ბახტაძემ.

მისი თქმით, უპირველესად თავისი დასკვნა უნდა დადოს გამოძიება, რომელსაც შინაგან საქმეთა სამინისტრო აწარმოებს.

"როგორც იცით, შახტში შრომის უსაფრთხოების გაძლიერებასთან დაკავშირებით არაერთი რეკომენდაცია არსებობდა. ძიება სწორედ ამ საკითხზე მიმდინარეობს, რომ ჩვენ ვიცოდეთ კონკრეტული სურათი, რამ გამოიწვია ეს ტრაგედია და რამდენად შესრულდა ის რეკომენდაციები, რომლებიც იყო გაცემული" - განაცხადა ბახტაძემ.

პრემიერის განცხადებით, მეორე მიმართულებაა საინჟინრო-ტექნიკური ექსპერტიზა, რომელიც ჩატარებული უნდა იყოს ისეთი ორგანიზაციისა და ადამიანთა ჯგუფის მიერ, რომელსაც მაღალი პროფესიული ნდობა აქვს.

"ჩვენ, ისევე როგორ მთელს საზოგადოებას უნდა ესმოდეს, რა გვაქვს ყველას ერთობლივად გასაკეთებელი, რომ მომავალში მსგავსი ადამიანური ტრაგედიები თავიდან ავიცილოთ“, - განაცხადა მამუკა ბახტაძემ.

პრემიერის თქმით, ამ დარგს სჭირდება გრძელვადიანი განვითარების სტრატეგია და სახელმწიფო უნდა ხედავდეს, რომ ორგანიზაციას აქვს ამის საშუალება და პერსპექტივა.

"აღარ მინდა, ამ შემთხვევაში პასუხი არ არის. არსებობს პასუხისმგებლობა. იქ მოხდა უზარმაზარი ტრაგედია და ეს არ არის პირველი შემთხვევა. ასე არ ხდება. ჩვენ სერიოზულ თემაზე ვსაუბრობთ და სერიოზულად ვუდგებით საკითხს", - აღნიშნა პრემიერ-მინისტრმა.

საქართველოს ინდუსტრიული ჯგუფი მზადაა სახელმწიფოს უსასყიდლოდ გადასცეს შპს საქნახშირი, რომელიც ტყიბულში ქვანახშირის მოპოვების უფლებას ფლობს. კომპანიამ განცხადება მას შემდეგ გაავრცელა, რაც 16 ივნისს ტყიბულის შახტში კიდევ 4 მუშა დაიღუპა.

ტყიბულში 16 ივლისს მინდელის შახტაში მომხდარ აფეთქებას 4 ადამიანის სიცოცხლე ემსხვეპლა. ამის გამო, საქართველოს შინაგან საქმეთა სამინისტრომ ტყიბულში არსებული 25-ვე შახტი დალუქა. მამუკა ბახტაძემ კი განაცხადა, რომ მინდელის შახტის დახურვის განმავლობაში მეშახტეებს აუნაზღაურდებათ ხელფასები.

ტყიბულში მეშახტეებმა საპროტესტო აქცია გამართეს და პრემიერ-მინისტრ მამუკა ბახტაძესთან შეხვედრა მოითხოვეს, რათა მან წარუდგინოს მუშებს ოფიციალური დოკუმენტი, რომ ისინი შახტებში გამოძიების დასრულებამდე, ხელფასებს მიიღებენ. ისინი ახალი ტექნოლოგიების დანერგვასაც მოითხოვენ შახტებში.

23 ივლისს საქნახშირის ხელმძღვანელებმა თანამდებობები დატოვეს, თანამდებობა არ დაუტოვებია გენერალურ დირექტორ ჯამბულ ჯაყელს. 2018 წელს ტყიბულის შახტში სულ 12 ადამიანი გარდაიცვალა